«Búgin Memleket basshysy Qasym-Jomart Toqaevtyń bastamasymen qolǵa alynǵan ákimderdiń saılaý úderisi bastaldy. Aýa raıy keremet, kún de jaqsy. Saılaý ótip jatqan úsh aýdanda barlyǵy 63 saılaý ýchaskesi bar. Sol ýchaskeniń bárinde tańǵy saǵat 6-da saılaý komıssııalary músheleri keldi. Sol jerde saılaýǵa daıyndyqty sońǵy márte pysyqtap, bıýlletenderdi úlestirdi, kelgen baıqaýshylardy tirkedi. Sóıtip tańǵy saǵat 7-de ánuran oınalyp, barlyq ýchaske saılaýshylarǵa esigin aıqara ashty. Árıne, barlyq saılaý ýchaskeleri aldyn ala qajetti daıyndyqtan ótti. Sondyqtan saılaýshylardyń daýys berýine barlyq múmkindik jasalǵan. Osy joly dodaǵa ár aýdannan úsh adam qatysyp otyr. Sonyń ishinde Amanat partııasy men Qazaqstan halyq partııasynan usynylǵan kandıdattar bar. Qalǵany ózin ózi usynǵan úmitkerler. Olar osy kúnge deıin saılaýshylarmen kezdesip, úgit-nasıhatyn júrgizip, baǵdarlamalaryn tanystyryp, kóp jumys atqardy. Endi búgin saılaýshylardy keremet ásermen, patrıottyq sezimmen saılaý ýchaskelerine kelip, óz úmitkerine daýys berýge shaqyramyz», dedi Batys Qazaqstan oblystyq aýmaqtyq saılaý komıssııasynyń tóraǵasy Ǵaısa Qapaqov.
Aıta keteıik, saıası naýqanǵa quramynda 378 múshesi bar 1 oblystyq aýmaqtyq, 3 aýdandyq aýmaqtyq, 63 ýchaskelik saılaý komıssııasy qyzmet etip jatyr.
Bókeı ordasy aýdanynda 9 141 saılaýshy tirkelgen. Saılaý ýchaskeleriniń barlyǵyna kerekti qural-jabdyq, ınternet jelisi qamtylǵan. Múmkindigi shekteýli 366 saılaýshy arnaıy jasaqtalǵan kabınalarda daýys bere alady. Aýdandyq aýmaqtyq saılaý komıssııasy bergen málimetke qaraǵanda, Bókeı ordasyndaǵy saılaýshylardyń eń úlkeni 97 jasta bolsa, 107 saılaýshy alǵash ret daýys beredi.
Ǵaısa Hamıdollauly saılaý ýchaskelerinde ázirge eshqandaı quqyqbuzýshylyq tirkelmegenin aıtady.
Tasqala aýdanynda da saılaý qalypty jaǵdaıda ótip jatyr. Aýdandaǵy 22 saılaý ýchaskesiniń beseýi aýdan ortalyǵy Tasqala kentinde ornalasqan. Munda 11 myńǵa jýyq saılaýshy óz tańdaýyn jasaýy kerek. Aýdandyq aýmaqtyq saılaý komıssııasy taratqan málimetke qaraǵanda, mundaǵy saılaý barysyn Amanat partııasynan – 22, respýblıkalyq «Daýys» qoǵamdyq birlestiginen – 22, «Namys» qoǵamdyq uıymynan – 20, «Aqjol» partııasynan 8 ókil baqylaý jumysyn júrgizip otyr.
Aýdandardan jetken málimetke qaraǵanda, ákim saılaýy kóp jerde merekelik kóńilmen, jaımashýaq ótip jatyr. Mysaly, bókeıordalyqtar saılaýǵa ulttyq kıimmen, salt at minip saltanatpen barǵan. Tasqala aýdanyna qarasty Mereı aýylynyń 17 kelini saılaýǵa bir mezette ulttyq kıimmen baryp daýys berdi. Al daýys berý eń belsendi, uıymshyldyqpen ótip jatqan Qaratóbe aýdanynda 98 jastaǵy Názıma Myrzagereeva ájemiz saılaý ýchaskesine óz aıaǵymen kelip, tańdaýyn jasaǵan. Ájemiz «eldiń tynyshtyǵy, óńir men aýdannyń turaqty damýy úshin daýys berdim», deıdi.
Batys Qazaqstan oblysy
