Aǵymdaǵy jaǵdaı týraly Densaýlyq saqtaý mınıstriniń orynbasary – Qazaqstan Respýblıkasy bas memlekettik sanıtarlyq dárigeri Aıjan Esmaǵambetova baıandady. Onyń málimdeýinshe, búginde A gepatıti men qyzylsha aýrýynyń kóbeıýi alańdaýshylyq týǵyzyp otyr. Tıisti vaksına saldyrmaı dertke dýshar bolǵandar qatary kóp. Máselen, qyzylsha eldiń barlyq aımaǵynda tirkelgen. Aýrýdy eń kóp juqtyrǵandar Shymkent pen Almatyda anyqtaldy.
«Osy rette jergilikti atqarýshy organdar men Astana, Almaty jáne Shymkent qalalarynda qyzylshaǵa qarsy qosymsha jappaı ekpe salý naýqanyna daıyndyq sharalaryn qolǵa alǵan jón», dedi A.Esmaǵambetova.
Vıse-premer Tamara Dúısenova buǵan derttiń qaýiptiligi týraly halyqtyń aqparattandyrylmaýy sebep bolýy múmkin ekenin atap ótti.
«Azamattardyń ekpeden bas tartýy, júrgizilgen nasıhat jumystarynyń nashar ekenin ańǵartady. Adam – ózine-ózi jaý emes. Qaýiptiń baryn bilse, ózin qorǵaý sharalaryn qoldanady. Densaýlyq saqtaý mınıstrligi jergilikti ákimdiktermen birlese otyryp, bul baǵyttaǵy jumysty kúsheıtýi kerek», dep tapsyrdy T.Dúısenova.
Sondaı-aq jıynda eldegi densaýlyq saqtaý mekemelerinde bolǵan tekserý jumystarynyń nátıjeleri týraly da aıtyldy. Birqatar nysanda aýrýhanaishilik ınfeksııalardyń aldyn alýǵa qatysty jekelegen talaptardyń saqtalmaǵany anyqtalǵan. Birazynda zararsyzdandyrý rejimi saqtalmaǵan, keıbirinde qarapaıym jeke qorǵanysh zattarynyń jetispeýshiligi anyqtaldy.
«Densaýlyq saqtaý mekemeleri ýaqtyly qarjylandyrylyp keledi. Olaı bolsa, mysaly, jeke qorǵanysh quraldary jetispeýshiligi neden týyndady? Bizdiń maqsat jazalaý emes, osy máselelerdi sheshý joldaryn qarastyrý. Degenmen shara qoldanýǵa ózderińiz ıtermeleısizder», dep atap ótti Premer-mınıstrdiń orynbasary.
Sonymen qatar Tamara Dúısenova másele sheshilmegen jaǵdaıda keıbir densaýlyq saqtaý nysandarynyń qyzmetin ýaqytsha toqtata turý máselesin qarastyrý kerek ekenin eskertti.
