senate_kz
Máýlen Áshimbaev búgingideı geosaıası turaqsyzdyq jaǵdaıynda jáne halyqaralyq uıymdardyń jumys tıimdiligi tómendegen kezeńde atalǵan konferensııany ótkizýdiń mańyzdylyǵyn atap ótti.
«Taıaý Shyǵysta jáne basqa da aımaqtarda qaqtyǵystar ýshyǵyp turǵan kezde rýhanı lıderlerdiń kezdesip, suhbat qurýy ózara túsinistik pen qurmetke negizdelgen dıalogty damytýǵa úlken úles qosady. Qazirgi tańda álem úshin din kóshbasshylarynyń jasampaz róli asa qajet. Osy oraıda búgingi konferensııa barsha halyqtyń ıgiligi úshin jáne ortaq syn-qaterlerdi eńserý jolynda shynaıy yntymaqtastyqty dáripteıdi. Mundaı kezdesýler konfessııaaralyq dıalogty nyǵaıtyp, álemdi alańdatyp otyrǵan ózekti problemalardy sheshýdiń tıimdi joldaryn izdeýge yqpal etedi dep senemin» degen Senat Tóraǵasy Qazaqstan dinaralyq dıalogtyń belsendi qatysýshysy ekenin de aıtty. Qazan aıynda Astanada ótken Sezd Hatshylyǵynyń otyrysynda qabyldanǵan Sezdi 2033 jylǵa deıingi damytý tujyrymdamasynyń negizgi tarmaqtaryn da tarqatty.
«Bizdiń Sezd aldaǵy jyldarda eń ózekti problemalardy sheshý úshin din lıderleriniń kúsh-jigerin jáne rýhanı dıplomatııanyń jasampaz áleýetin tıimdi paıdalanýdy maqsat tutyp otyr. Álemdik rýhanı kóshbasshylar birlese otyryp, adamzat aldynda turǵan ekzıstensıaldy túıtkilderdi sheshýge aıtarlyqtaı úles qosa alady. Onyń ishinde klımattyq syn-qaterlerdi eńserý, kedeılik pen teńsizdikti tómendetý, ekstremızmge qarsy kúres, qaqtyǵystardy toqtatý sııaqty mańyzdy máseleler bar», dedi Senat Tóraǵasy.
Máýlen Áshimbaev sapar barysynda áriptesi – Birikken Arab Ámirlikteri Federaldy Ulttyq Keńesiniń Tóraǵasy Sakr Ál-Gobashpen, Qasıetti Taqtyń Memlekettik hatshysy Kardınal Petro Parolınmen, Dúnıejúzilik shirkeýler keńesiniń Bas hatshysy Djerrı Pılleımen kezdesti. Dıdarlasý sátinde 2023-2033 jyldarǵa arnalǵan Álemdik jáne dástúrli dinder kóshbasshylary Sezin damytý tujyrymdamasyn talqylady. Senat Tóraǵasy dinaralyq dıalogty damytý jáne adamgershilik qundylyqtardy nyǵaıtý boıynsha birlesken kúsh-jigerdi ári qaraı jandandyrýdyń mańyzy zor ekenin aıtty.
