Bul bastama Memleket basshysy Qasym-Jomart Toqaevtyń úsh joǵary oqý ornynyń bazasynda jasandy ıntellekt salasyndaǵy kadrlar daıarlaý jáne osy salada zertteý júrgizetin ortalyqtar ashý jónindegi tapsyrmasy sheńberinde iske asyryldy. Joǵary mektep jasandy ıntellekt, kıberqaýipsizdik jáne ınformatıka salasynda kadrlar daıarlaıtyn bolady. Stýdentter Seýl ulttyq ǵylym jáne tehnologııalar ýnıversıtetimen (Seýlteh) birlesken baǵdarlamalar boıynsha bilim alady, bul álemdik IT tehnologııalarǵa qoljetimdilikti qamtamasyz etedi. Joba aıasynda oqý orny Koreıanyń zamanaýı zerthanalyq qurylǵylarymen jabdyqtalady, al stýdentter birneshe tildi meńgerip, orys jáne qazaq tilderinen bólek, aǵylshyn, koreı tilderinde bilim alady.
Jıynda Saıasat Nurbek jobanyń mańyzyna toqtaldy.
– Prezıdent Qasym-Jomart Toqaev jasandy ıntellekt tehnologııalarynyń damýy el bolashaǵy úshin strategııalyq mańyzdy baǵyt ekenin atap ótti. Jasandy ıntellekt tehnologııalaryn qoldanysqa engizý erekshe nazar aýdarýdy qajet etedi. Sondyqtan Ǵylym jáne joǵary bilim mınıstrligi osy baǵyt boıynsha bilim berý baǵdarlamalaryn iske asyrýǵa kiristi. Qorqyt ata ýnıversıtetinde Seýltehtiń joǵary jasandy ıntellekt mektebiniń ashylýy IT tehnologııalar salasynda adamı kapıtaldy qalyptastyrýǵa, ǵylymı zertteý nátıjeleri jáne ózara tájirıbe almasýǵa, sondaı-aq Koreıa men Qazaqstan arasyndaǵy joǵary bilim berý salasyndaǵy ekijaqty yntymaqtastyqty odan ári ilgeriletýge serpin beredi. Sondaı-aq aldaǵy ýaqytta sheteldik ýnıversıtettiń fılıaly men qos dıplomdy baǵdarlama ashý josparlanyp otyrǵanyn habarlaǵym keledi. Sonyń nátıjesinde túlekter Seýltehtiń jáne Qorqyt ata atyndaǵy Qyzylorda ýnıversıtetiniń dıplomyn ala alady, – dedi mınıstr.
Sondaı-aq S.Nurbek Memleket basshysynyń tapsyrmasyn oryndaý maqsatynda elimizde keıingi eki jylda M.Qozybaev atyndaǵy Soltústik Qazaqstan ýnıversıtetiniń bazasynda Arızona ýnıversıteti, Q.Jubanov atyndaǵy Aqtóbe óńirlik ýnıversıteti bazasynda Herıot-Ýott ýnıversıteti (Shotlandııa), Esenov ýnıversıtetiniń bazasynda Nemis joǵary oqý oryndarynyń konsorsıýmy jáne basqa da jetekshi sheteldik joǵary oqý oryndarynyń 8 fılıaly ashylǵanyn atap ótti. Mınıstrdiń aıtýynsha, sheteldik ýnıversıtetterdiń fılıaldaryn ashý bilim berý salasyn damytýǵa jáne halyqaralyq arenada joǵary bilim salasy boıynsha kóshbasshy atanýǵa mańyzdy qadam bolmaq.
LUPIC jobasynyń elimizdegi ortalyǵynyń dırektory, Seýl ulttyq ǵylym jáne tehnologııalar ýnıversıtetiniń kvanttyq jasandy ıntellekt qaýipsizdigi jahandyq ortalyǵynyń dırektory Djesý Kım joba aıasynda joǵary mektep ashý ǵana emes, Qorqyt ata ýnıversıtetiniń bazasynda bıznes-ınkýbator qurý kózdelip otyrǵanyn atap ótti. «Bıznes-ınkýbator aıasynda stýdentter óz talanttaryn shyńdap, startaptar ázirlep, alǵan bilimderin búkil álem boıynsha jasandy ıntellektti damytý úshin paıdalanatynyna senimdimin», dedi Djesý Kım.
Osy jyldyń qyrkúıeginen bastap Qorqyt ata atyndaǵy Qyzylorda ýnıversıtetinde IT mamandyqqa túsken jáne Seýltehtiń baǵdarlamasy boıynsha oqýǵa iriktelgen 1-kýrs stýdentteri úshin tildik daıarlaý jumystary bastaldy. Qazir olar jalpy bilim beretin pánderdi oqyp, jedeldetilgen tildik kýrstardan ótip jatyr. Bolashaqta stýdentter men professor-oqytýshylar quramy akademııalyq utqyrlyq jáne birlesken bilim berý baǵdarlamalary boıynsha Seýlde oqýǵa jáne ǵylymı taǵylymdamadan ótýge bara alady. Al Seýlden oqytýshylar óz tájirıbesimen bólisý úshin Qyzylordaǵa shaqyrylady.
Seýl ulttyq ǵylym jáne tehnologııalar ýnıversıteti – Koreıada 1910 jyly negizi qalanǵan ulttyq ýnıversıtet. Oqý ornynda 23 fakýltet, 15 myńǵa jýyq stýdent bar. Seýlteh joǵary mektebiniń ashylýyna Qyzylordada ómir súrgen Koreıanyń ulttyq batyry, general Hon Bom Do súıeginiń tarıhı otanyna qaıtarylýy yqpal etti. Qaıta jerleý rásimine Hon Bom Dony eske alý qoǵamy belsendi qatysty.
