«Túngi stýdııa» baǵdarlamasynda qonaqta bolǵan akter alǵashynda qıyn bolǵanyn, alaıda nebári 2 aı ishinde úırenip alǵanyn aıtady.
«Túsirilim bastalardan bir kún buryn mátindi aldym. Túrikshe bilmeımin. О́zimizdiń baýyrymyz, Túrkııada eki maýsym serıal túsirgen rejısser Nurǵısa Álmuratqa habarlastym. Mátinin jiberip, «Ne isteımin? Qalaı aıtamyn?» dep aqyl suradym. Nurǵısa «Saspańyz» dep qoıady. Sózin jattadym. Senesiz be, 5-6 kúndeı túsirilim alańyna sózin jattamaý nemese daıyndalmaı kelý meniń kásbim deńgeıimniń tómen ekenin kórsetedi. Bul meniń namysyma tıedi. Men Qazaqstanda, Reseıde ondaıdy jibermeımin. Al munda túrik tili bolǵan soń kishkene qıyndyq týǵyzdy. Sodan 6 kún boıy kún demeı, tún demeı jarty saǵat saıyn sózderdi jattadym. Nurǵısa mátindi dıktofonǵa jazyp berdi. Men ony oqyp, tyńdap, qaıtalap júrdim», – deıdi akter.
Sondaı-aq ol alǵashqy aptada 5 kelige aryqtaǵanyn aıtady.
«5 kelige aryqtadym. Ne bolar eken?» dep ýaıymdadym. Solaı jattap júrdim. Altynshy kúni úıge, dostaryma habarlasyp, kishkentaı bala sekildi erkelep, «Úıge qaıtqym kelip tur? Nege keldim?» dep aıttym. Alaıda, adam qınalǵanda, qysylǵanda bir amalyn tabady ǵoı. Nurǵısanyń oqyp bergen mátinin ózim mánerlep oqyp, túsinip, sosyn sózdikke júginip, áıtip-búıtip aýdaryp otyrdym. Barlyq mátindi solaı jattap aldym. Altynshy kúni rejısser, túsirilim toby men ártister «Bul qalaı 5-6 kúnde jattap, mashyqtanyp aldy?» dep ań-tań boldy. Sóıtip, janym aman qaldy. Biraq eki aıdan soń ol da kerek bolmaı qaldy. Úırenip aldym», – deıdi akter.
