Mańǵystaý oblysy ákimdigine qarasty Jastar saıasaty máseleleri jónindegi basqarma men «Otbasy bank» arasynda qol qoıylǵan memorandým aıasynda «Mańǵystaý jastary» turǵyn úı baǵdarlamasy iske qosylady. Ekijaqty kelisimge sáıkes óńir jastary bastapqy jarnasy 10 paıyz, al jyldyq mólsherlemesi 5 paıyz (JTSM 5,2%) nesıemen turǵyn úı satyp alý múmkindigine qol jetize alady.
Baǵdarlamaǵa dárigerler, muǵalimder, mádenıet jáne sport qyzmetkerleri, joǵary oqý oryndarynyń oqytýshylary, ǵylymı qyzmetkerler, jýrnalıster, áleýmettik sala, memlekettik jáne kommýnaldyq kásiporyn qyzmetkerleri, sondaı-aq TJD, azamattyq qorǵanys qyzmetkerleri men aýyl sharýashylyǵy salasynyń ókilderi qatysa alady.
«Biz jastar tarapynan baspanamen qamtý máselesi jónindegi usynys-pikirlerdi estip júrmiz. Atalǵan qajettilik pen suranysty oryndaý maqsatynda bıyl Mańǵystaý oblystyq máslıhatynyń qoldaýymen jergilikti bıýdjetten 500 mln teńge kóleminde qarjy qarastyryldy. Negizgi maqsat – óńir jastaryn turǵyn úımen qamtamasyz etý arqyly memlekettik sektor salasyndaǵy jas mamandardy yntalandyrý. Atalǵan baǵdarlamany iske asyrý osy aıdyń ortasyna josparlanǵan. Búgingi kúni «Otbasy bank» AQ Mańǵystaý oblystyq fılıalymen birlesken jumys nátıjesinde birqatar kelisimge keldik», dedi Mańǵystaý oblysynyń Jastar saıasaty máseleleri jónindegi basqarmasynyń basshysy Muqash Oralbaı.
«Otbasy bank» AQ basqarma tóraıymynyń orynbasary Nurlan Aqshanovtyń aıtýynsha, jastarǵa arnalǵan mundaı baǵdarlama elimizdiń 16 óńirinde iske qosylǵan.
«Biz Mańǵystaý jastarynyń bolashaǵyna úlken qadam jasap otyrmyz. О́ıtkeni baspana máselesi – jastar úshin óte ózekti. Bul ajyrasýdyń aldyn alýǵa septigin tıgizedi dep oılaımyn. Paıyzdyq mólsherleme óte yńǵaıly – 5 paıyz. Bastapqy jarna da osy sanat úshin 10 paıyzdy quraıdy. Jastar aýdandardan úı satyp alatyn bolsa, 10 mln teńgege deıin, al Aqtaý qalasynan satyp alsa, 15 mln teńgege deıin nesıe ala alady. Bul baǵdarlama jastarǵa birqatar jeńildik týdyrady degen oıdamyn. О́tinimder resmı saıtta qabyldanady. 15 qarasha – Ulttyq valıýta kúni ótinim qabyldaý bastalady. Aldaǵy ýaqytta qarjylandyrý mólsheri ósedi. Turǵyn úıdi alǵashqy jáne ekinshi naryqta satyp alýǵa bolady. Osyndaı shartpen Mańǵystaý jastary ózderiniń máselesin sheshetin bolsa, Mańǵystaý oblysy ákimdigi men oblystyq máslıhattyń bastamasyn quptaý kerek», dedi N.Aqshanov.
Jańa baǵdarlamanyń erejesin ázirleý maqsatynda quramynda Mańǵystaý oblystyq máslıhat depýtattary, óńirlik Qoǵamdyq keńes músheleri, jastar uıymdarynyń ókilderi men Jastar saıasaty máseleleri jónindegi basqarma ókilderi bar arnaıy jumys toby quryldy. Jumys tobynyń kún tártibindegi eń negizgi másele – osy turǵyn úı baǵdarlamasynyń ashyqtyǵyn jáne jastar arasyndaǵy qoljetimdiligin arttyrý.
«Biz jumys tobymen birlesip, elimizde júzege asyrylǵan jastarǵa arnalǵan memlekettik baǵdarlamalardyń kemshilikteri men artyqshylyqtaryn saraladyq. Sáıkesinshe, óńirdegi jastardyń suranysyna oraı, meılinshe qoljetimdi baǵdarlama jasaýǵa tyrystyq. Onyń erejesin tıisti jumys toby maquldap, óńir basshysy Nurlan Noǵaev óz qaýlysymen bekitti. Endi «Mańǵystaý jastary» resmı saıtynda qujat qabyldaý bastalmaq», deıdi M.Oralbaı.
«Mańǵystaý jastary» baǵdarlamasy boıynsha áleýetti nesıe alýshylardyń tizimin jergilikti ákimdik qalyptastyrady. О́tinishter arnaıy saıtta, qashyqtan qabyldanatyn bolady. О́tinishter qabyldanǵannan keıin oblys ákimdiginiń qyzmetkerleri jınalǵan upaıǵa qaraı qatysýshylardy tańdaıdy. Upaılarǵa nekede turǵan jyldar sany, balalarynyń bolýy, mamandaǵy boıynsha úzdiksiz jumys ótili áser etedi.
Jaǵymdy jańalyqty estigen jastardyń qyzyǵýshylyǵy joǵary. Jańa baǵdarlama baspana alýda tyǵyryqqa tirelip júrgen jas azamattardyń armanyna qol jetkizýine sep bolady dep oılaımyz.
Mańǵystaý oblysy
