Vıse-premer Tamara Dúısenova Úkimet tarapynan medısınalyq kómek, bilim berý, áleýmettik qorǵaý sapasyn arttyrý jáne balalardy tıisti ınfraqurylymmen qamtý boıynsha keshendi sharalar qabyldanǵanyn atap ótti. Búginde balalar eldegi halyq sanynyń úshten birin (elimizde 6,8 mln bala men jasóspirim) quraıdy.
«Balabaqshalardaǵy oryn tapshylyǵy máselesin sheshý úshin elimizde jyl saıyn mektepke deıingi mekemeler qatary kóbeıip keledi. Sapaly orta bilimmen qamtý maqsatynda mektep qurylysy qarqyndy júrip jatyr. О́skeleń urpaqty áleýmettik qoldaýǵa erekshe kóńil bólinip otyr. Alaıda balalardyń qaýipsizdigi máselesi áli de ózekti. Sondyqtan bul zań jobasy qoǵam úshin óte mańyzdy. Qujattyń sapasy sarapshylardyń usynystary men olardyń bul salada jınaqtalǵan zor tájirıbesine baılanysty», dep atap ótti Tamara Dúısenova.
Zań jobasy týraly Qazaqstan Respýblıkasy Bala quqyqtary jónindegi ýákil Dınara Zákıeva aıtyp berdi. Onyń aıtýynsha, qujatta elimizde otbasylar men balalarǵa kómek kórsetýge baǵyttalǵan ınfraqurylym jasaý qarastyrylǵan. Ár aýdanda qoldaý ortalyqtary, ár oblysta psıhologııalyq qoldaý ortalyqtary salynady.
Zań jobasy ázirge 50-den asa talapty qamtyp otyr. Endi ondaǵy norma qoǵam arasynda keńinen talqylanady. Premer-mınıstrdiń orynbasary barlyq múddeli taraptardy bul iske atsalysýǵa shaqyrdy. Al bala quqyqtary jónindegi aımaqtyq ýákilderden Tamara Dúısenova óńirlerde túsindirý jumystaryn júrgize otyryp, azamattardyń jobaǵa qatysty talap-tilekterin jınaýdy surady.
