Bul týraly Oqý-aǵartý mınıstrliginiń apparat jınalysynda aıtyldy. Atalǵan organ basshysynyń orynbasary Aıbat Ilııasov biryńǵaı bazanyń jobasy tıimdi qarjylandyrýdy kózdeıtinin jetkizdi.
«Búginge deıin balalardy kezekke qoıyp, balabaqshaǵa berý kezinde: málimetter bazasynyń shashyrańqylyǵyna baılanysty balalardy kezekke qoıýda qaıtalaýlardyń bolýy; jalpy kezek qurylady jáne joldama alý úshin ata-analardyń balabaqshadan oryn «ustap alýǵa» (ata-analar tańǵy 6-dan turyp kompıýter aldynda bir túımeni basyp qalý úshin jantalasady – red.) májbúrligi nemese deldaldarǵa júginýi; balabaqshaǵa qabyldaý kezinde qaǵaz qujattaryn jınaý sekildi birqatar kemshilikter boldy. Osyǵan oraı saraptamalyq qoǵamdastyqtyń usynystary men ata-analardyń pikirlerin eskere otyryp, qyzmet kórsetýdiń jańa modeli anyqtaldy. Jobanyń negizgi maqsaty – tıimdi qarjylandyrý jáne balalardy mektepke deıingi tárbıemen qamtýdy qamtamasyz etý. Jańa úlgi árbir otbasyna jeke qajettilikteri men qaraýlaryna qaraı tórt balabaqshaǵa deıin tańdaýǵa múmkindik beredi. Bul qyzmet kórsetý úderisin ashyq etedi jáne aldyn ala SMS habarlaý arqyly balabaqshalardaǵy oryndy «ustap alýǵa» májbúrlemeıdi, – dedi vıse-mınıstr A.Ilııasov.
Mınıstrlik ókiliniń málimdeýinshe, otbasynda ekiden kóp bala bolsa, ata-analar balalaryn bir balabaqshaǵa bere alady. Memlekettik derekqorlardan ıntegrasııa arqyly jeńildik mártebesin rastaý úshin qaǵaz anyqtamalardy jınaý jáne tirkeý alynyp tastalady. Turǵyndarǵa yńǵaıly bolý úshin ótinish berýdiń birneshe tásili qarastyrylǵan, ıaǵnı ata-ana elektrondy úkimet portaly, ekinshi deńgeıli bankterdiń mobıldi qosymshalary, jergilikti atqarýshy organdardyń platformalarynyń bireýin tańdap, «bir terezeden» ǵana balasyn balabaqshaǵa ornalastyra alady.
«Memlekettik qyzmet eki kezeńnen turady. Birinshi kezeńde qyzmet alýshy kezekke qoıýǵa ótinish bergen kezde jeńildik mártebesi avtomatty túrde rastalady jáne balabaqshany tańdaǵannan keıin qyzmet alýshyǵa kezek nómiri beriledi. О́mirlik jaǵdaıy ózgerse, qyzmet alýshyǵa balabaqshany aýystyrý, kezek nómirin qaraý nemese qajet bolsa, kezekten shyǵarý múmkindigi beriledi. Ekinshi kezeńde tańdalǵan balabaqshada oryn bosaǵan kezde qyzmet alýshyǵa SMS habarlama túsedi jáne kelisim berý arqyly balanyń balabaqshaǵa qabyldaýyn rastaıdy. Balanyń densaýlyǵy týraly qajetti qujattar Densaýlyq saqtaý mınıstrliginiń derekter bazasynan avtomatty túrde alynady. Balany balabaqshaǵa qabyldaý úshin balabaqsha men qyzmetti alýshy arasyndaǵy shartqa qol qoıý onlaın rejimde jasalady. Ata-analarǵa balabaqsha, kezek pen bos oryndar týraly aqparatty zerdeleý, sondaı-aq balabaqsha tańdaý múmkindigin berý maqsatynda karta ázirlendi. Osy karta elektrondy úkimettiń portalynda bolady. Ata-ana sol kartaǵa súıenip, turǵylyqty jerine, jumysyna jaqyn nemese basqa da jeke qalaýy boıynsha balabaqshany tańdaı alady», dedi mınıstrdiń orynbasary.
Jaýapty mınıstrliktiń habarlaýynsha, Biryńǵaı esepke alý bazasy tolyqtaı ázirlengen. Memlekettik qyzmet kórsetý qaǵıdalarynyń jobasy da daıyndalypty. Qanatqaqty joba Qaraǵandy oblysyndaǵy Shahtınsk qalasynda jáne soltústiktegi Petropavl qalasynda iske qosyldy. Qanatqaqty jobanyń ýaqyty aıaqtalǵannan keıin, ıaǵnı 2024 jyldyń qańtarynan bastap jańa júıe respýblıka boıynsha jumys isteıdi.
