KTK arnasynyń jazýynsha, jerdiń zańdy ne zańsyz ekenin ákimdiktegilerdiń ózi de aıta almady. Qaskeleń qalasynyń joǵarǵy jaǵyndaǵy úıler osydan 10 shaqty jyl buryn salynǵan.
Shamamen 100-ge jýyq úı bar. Bul qalaǵa, ary Almatyǵa shyǵatyn jalǵyz jol. Endi aldaǵy ýaqytta bul jol da jan-jaǵynan jabylyp, turǵyndar múldem qamalyp qalamyz ba dep qorqyp otyr.
Oǵan sebep turǵyndar kezinde óz qarajatyna salǵan joldy osydan úsh aı buryn biri qoparyp, qaqpa salyp tastaǵan. Sebebin surap kelse, úı ıesi "qujattarym túgel" dep jaýap qaıyrypty. Jurt jol turǵan jerdi satyp jibergen ákimdiktegiler ekenine senimdi.
"Mine, myna asfalt. Osyny qoldan jasap asfalt tósegenbiz. Endi myna kisiler bizdiń memlekettik aktimiz bar dep jaýyp tastady. Jol bylaı qaraı kelý kerek. Endi joq. Ashyp berýin talap etemiz”, – deıdi turǵyndar.
100-ge jýyq otbasy qazir kórshisiniń ýchaskesimen ótip júr. Biraq zańdy ıesi onda úı salatyn bolsa, turǵyndardyń ne ary, ne beri shyǵa almaı qalatyn túri bar.
"Myna jol tórt kósheniń jalǵasy. Kórshiniń ýchaskesi ana baǵanadan bastap, myna bir jerge keledi. Sonda jalǵyz jol. Mektepke de barady. Mektepte 300 bala oqıdy. Olarǵa da jol joq, bizge de joq. Eger ol kisi jaýyp tastaıtyn bolsa, biz tikushaqpen ushyp júrýimiz kerek”, – deıdi Baýyrjan Seıitjanuly.
Qaskeleń qalasynyń bas jospary boıynsha bul bireýdiń jer telimi eken.
“Mynaý bas jospar 2018 jyly ózgeris engizilgen. Sizderdiń suraýlaryńyz boıynsha, mynaý bireýdiń jer telimi jolǵa túsken. Onyń qazir zańdylyǵyn qosymsha anyqtaımyz. Sáýlet, jer qatynastary bólimi bar, solarmen anyqtap, qosymsha aqparat beremiz. Al halyqtyń surap otyrǵan, yńǵaısyz týǵyzdyryp otyrǵan jer telimine biz qazir demeýshilerdiń arqasynda tas tóseý, jol tegisteý jumysyn surap otyrmyz. Osy qarasha aıynyń sońyna deıin halyqqa sol jerdi tegistep, yńǵaıly ótýine jaǵdaı jasaımyz”, – deıdi Qaskeleń qalasy ákiminiń orynbasary Serik Qamzanov.
Bul jer teliminiń joldyń ústine qalaı túsip ketkenin atqaminerler bilmeı me, álde ashyp aıtqysy kelmeı me, belgisiz. "Anyqtaımyz" degennen ary asa almady. Dese de máseleni bir jaqty qylamyz dep sendirdi. Alaıda jergilikti turǵyndar shendilerden baıaǵyda kúderin úzgen. Túıtkildiń túıini jaqyn arada tarqatylmasa, quzyrly organdarǵa júginemiz dep otyr.
