Mınıstrdiń bul jaýaby qoǵamda qyzý talqylanyp, turǵyndar sanasynda saýal týyndatty.
Svetlana Jaqypova bul másele boıynsha jumysshy azamattardy shartty túrde eki topqa bólýge bolatynyn aıtty. Olar: 1998 jylǵa deıin eńbek ótili barlar jáne bul kezeńnen keıingi eńbek ótili bar el turǵyndary. Sebebi Qazaqstanda mindetti zeınetaqy jarnalary júıesi 1998 jyldan bastap jumys isteı bastady.
Birinshi top zeınetaqy alý úshin mynadaı qujattardy tapsyrý kerek:
eńbek kitapshasy;
erler úshin áskerı bılet;
áıelder úshin balalarynyń týý týraly kýálikteri;
kúndizgi bólimniń dıplomy.
Eńbek kitapshasy - 1998 jylǵa deıingi eńbek ótilin rastaıtyn negizgi qujat. Bul talap Keńes Odaǵy kezeńinde jumys istegen adamdarǵa qatysty. Memleket atalǵan azamattarǵa da zeınetaqy tóleıdi. Ol úshin eńbek kitapshasyndaǵy barlyq jazbalar rastalý kerek. Quzyrly organ eger zeınetaqy alýǵa ótinish berýshi eńbek ótilin rastamasa kórsetilgen merzim esepke alynbaýy múmkin ekenin eskertedi.
Al 1998 jylǵa deıin jumys istemegen azamattardan eńbek kitapshasy suralmaıdy.
1998 jyldan keıin jumys isteı bastaǵandar úshin eńbek ótili tek zeınetaqy aýdarymdary, salymshy qarajatynyń túsýine qaraı esepteledi. Mamandar tolyq bazalyq zeınetaqy alý úshin shtattan tys jumys isteıtinder men frılanserlerge de mindetti zeınetaqy aýdarymdaryn jasaýǵa keńes beredi. Zeınetaqy kapıtalyn jasaǵan adam ómirden erte ketse, onyń jıǵan sommasy kelisimshartta kórsetilgen kólemde ǵana balalary men jubaıyna muraǵa qalady.
