Kollajdy jasaǵan –Záýresh Smaǵul, «EQ»
О́z valıýtamyzben esep aıyrysýdyń qanshalyqty mańyzdy ekenin keıingi býyn túsine jatar, al orta jáne aǵa býyn ulttyq qundylyqtar kórinis tapqan derbes valıýtanyń qadir-qasıetin anyq biledi. Kópke málim desek te, keıbir derekterdi oqyrman esine salyp ótýdiń artyǵy bolmas. Ulttyq valıýtany aınalymǵa engizý jónindegi memlekettik komıssııa 1993 jyly 3 qarashada quryldy. 1993 jyly 12 qarashada Prezıdent «Qazaqstan Respýblıkasynyń ulttyq valıýtasyn aınalymǵa engizý týraly» Jarlyqqa qol qoıdy. Al 15 qarashadan bastap teńge elimizdegi jańa aqsha birligine aınaldy. Kóp uzamaı, ıaǵnı 1995 jyly 19 mamyrda elimizde Banknot fabrıkasy resmı túrde ashyldy. Ulttyq bank deregi boıynsha, sol jyly 83 mıllıonnan asa, bir jyldan keıin 104 mıllıonnan asa banknot shyqty. Al moneta saraıy onyń aldynda, 1992 jyly О́skemen qalasyndaǵy Úlbi metallýrgııa zaýytynyń bazasynda qurylǵan edi.
Teńge arqyly qyz-qyz qaınap jatatyn bank sektory da 90-jyldardan beri talaı baspaldaqtan ótti. Eseıdi. Eńse tiktedi. San túrli túıtkildiń kúrmeýin tarqatqan bank salasy táýekelderge tózimdi bolýdy da úırendi. Birqatar reforma júrgizildi. Memleket tarapynan bankterdi saýyqtyrý da júzege asyryldy. Munyń artyǵy men kemin sarapshylar talaı tarazyǵa tartty da. Eń bastysy, teńge men bank sektory qaıtse naryqtyq syn-qaterlerge qarsy tura alady degen saýaldarǵa jaýap taba bastadyq. Bul bizdiń jańarǵanymyzdyń, jetilgenimizdiń belgisi edi.
