Foto: Ashyq derekkóz
«Jemqorlyq úshin sottalyp, artynan raqymshylyqqa ıe bolǵan eks-sheneýniktiń óz áıelin óltirgeni týraly jantúrshigerlik ashyq aqparattar qoǵamda alańdaýshylyq týǵyzdy. Otbasylyq zorlyq-zombylyq, qatygezdik, patrıarhattyq ozbyrlyqqa shydamaǵan áıelderdiń jan daýysyn estıtin jáne qatań shara qabyldaıtyn ýaqyt jetti», dedi Májilis depýtaty.
J.Súleımenovanyń aıtýynsha, 2020 jyldan beri depýtattardyń usynystarymen zańnamada birneshe qatań ózgerister engizilgen. Bir ǵana mysal: Turmystyq zorlyq-zombylyq bolǵan jaǵdaıda hattama jasaý úshin qazir kýágerlerdiń aıǵaqtaryna jáne beınebaqylaýǵa súıene otyryp, zorlyq-zombylyq jasaý faktisi boıynsha jábirlenýshiniń aryzynsyz da is qozǵaý qarastyrylǵan. Biraq buǵan qaramastan zorlyq-zombylyqtyń tolastamaýy – áıelderdiń quqyǵyn qorǵaý men balalar qaýipsizdigin saqtaý zańnamasyn qatańdatýmen qosa, qoǵamda qylmysqa «múldem tózbeýshilik» prınsıpi men zań-tártiptiń qatań saqtalýy dáripteýdi-nasıhattaýdy qajet etedi. Sol kezde ǵana qabyldanǵan zańdar sapaly oryndalatyn bolady.
«Memleket basshysy otbasynda oıran salatyndar jazaǵa tartylmasa, olar odan beter basynyp ketedi, mundaı áreketter úshin jazany kúsheıtetin kez keldi dep sanaımyn degen bolatyn. «AMANAT» partııasy fraksııasy osy tapsyrmany oryndaý maqsatynda Qazaqstannyń keıbir zańnamalyq aktilerine áıelderdiń quqyǵyn qorǵaý jáne balalardyń qaýipsizdigin qamtamasyz etý máselelerine arnalǵan zań jobasyn shuǵyl túrde ázirledi. Zań tujyrymdamasynda túzetýler: zorlyq-zombylyqty qylmys retinde taný, pedofılderge ómir boıy bas bostandyǵynan aıyrý jazasyn kesý, jalpy jaza men jaýapkershilikti kúsheıtý tetikterin qarastyrǵan», dedi depýtat.
Depýtattyń sózinshe, ókinishke qaraı, túsiniksiz sebeptermen zań áli Májiliske engen joq. Úkimettik emes uıymdardyń zertteýlerinshe 2021 jyly úıdegi zorlyq-zombylyqtyń sotqa tek 40 paıyzy jetken, al olardyń 39 paıyzy 2 saǵattan 3 táýlikke deıingi ákimshilik jazamen qutylyp ketken.
Qazaq áıeliniń bolashaǵy, búgingi taǵdyry barsha qoǵamǵa tikeleı baılanysty degen Juldyz Súleımenova «AMANAT» partııasynyń depýtattary atynan mynadaı usynystaryn alǵa tartty.
- Áıelder men balalar zorlyq-zombylyqtyń qurbany bolmas úshin tipti jeńil túrdegi zorlyq-zombylyq – qylmys dep tanylýy qajet. Áıel men balaǵa zorlyq-zombylyq kórsetkenderge aıaýshylyq tanytýǵa bolmaıdy. Eshkimniń áıel adamdardy qorlap, óltirýge qaqy joq, qylmyskerge qatań jaza berilýin talap etemiz.
- Zańnamada turmystyq zorlyq-zombylyqtyń aldyn alatyn hám qatań sharalar qabyldaıtyn jaýapty memlekettik organdy bekitetin ýaqyt jetti. Úkimetten áıelderdiń qaýipsizdigin qamtamasyz etý boıynsha, sonymen qatar, ajyrasqan áıelderge alımentti ýaqtyly tóleýge baǵyttalǵan naqty mehanızmderdi aıqyndaıtyn memlekettik saıasatty bekitýdi suraımyz.
- Otbasylyq zorlyq-zombylyqtyń profılaktıkasy men krımınalızııasy qarastyrylǵan birneshe depýtattardyń bastamasymen ázirlengen Qazaqstannyń keıbir zańnamalyq aktilerine áıelderdiń quqyǵyn qorǵaý, balalardyń qaýipsizdigin qamtamasyz etý máselelerine arnalǵan zań tujyrymdamasyn Májiliske tez arada engizýin suraımyz.
«Memleket basshysy atap aıtqandaı, zań men tártip ishki turaqtylyqtyń kepili. Zań ústemdigi qaǵıdaty bizdiń eń basty baǵdarymyz bolýy tıis», dep túıindedi Juldyz Súleımenova.
