Mýzeıdiń aǵa ǵylymı qyzmetkeri Gúlzaıra Sábıtovanyń jazýynsha, bul jádigerdi murajaıdyń sol kezdegi ǵylymı qyzmetkeri aqyn, sazger Kárim Ilııastegi tapsyrǵan. Bóriktiń tóbesi tórt saı bolyp keledi. Arasyna jún salyp, tóbesin sur tústi matamen qaptaǵan. Jıegi pushpaq terimen kómkerilgen.
Halyq aqyny Moldahmet Tyrbıevtiń esimi kóziqaraqty qaýymǵa tanys. Ol 1881 jyly qazirgi Soltústik Qazaqstan oblysynyń Shal aqyn aýdany Týlaq aýylynda týǵan. Bul aýyl keńes dáýirinde «Qyzyltý» keńshary, keıin «Eńbek» aýyly dep atalǵan. Moldahmet atamyz – ataqty aqyn, ánshi Úkili Ybyraıdyń týǵan jıeni ǵana emes, ónerin qýǵan shákirti. Sondaı-aq kórnekti aqyn Kákimbek Salyqovtyń nemere týysqany.
Moldekeń Kákimbekti bala kúninen ónerge baýlyp, dombyra úıretedi. Tálim -tárbıesin beredi. Kákimbek aǵamyz atasy týraly bir esteliginde: «Moldekeń molda da, bolys ta bolǵan áıgili aqyn, sýyryp salma aıtysker hám úzdik ánshi, tamasha dombyrashy. О́leń úıretýdegi tásili – áý degennen bárimizge óleńniń sózin jazdyrady, sodan soń ózi ádemilep turyp úsh ret aıtyp beredi. Al ári qaraı kádimgi baıqaý ótkizetin professor sııaqty bárimizdi tyńdaıtyn, eń jaqsy aıtqanymyzdy alyp qalyp, ońasha úıretetin», dep jazypty.
M.Tyrbıevtiń Janaq, Orynbaı, Birjan sal, Aqan seri, Jaıaý Musa, Balýan sholaq, Úkili Ybyraı sekildi Arqadaǵy aqyn-jyrshylar men sal-serilerdiń dástúrin jalǵastyryp, solardyń shyǵarmalaryn keıingi urpaqqa jetkizýdegi eńbegi óte zor. Sonymen birge aıtys óneriniń de damýyna zor úles qosty. Aqynnyń ózi de óleń jazyp, án shyǵarǵan. Onyń «Jeńis» jáne «Terme» atty ánderi kezinde halyq arasyna keń taraǵan.
