15 qarashada Soltústik Qazaqstan oblystyq prokýratýranyń baspasóz qyzmeti habarlaǵandaı, qadaǵalaýshy mekeme múgedektiń quqyqtaryn óreskel buzý faktisin tirkedi. Prokýrorlar 2021 jyly Petropavl turǵynyna 279 780 teńge nesıe berilgenin anyqtady.
Alaıda kúrdeli psıhıkalyq dertine baılanysty II top múgedegi dep tanylǵan er adam nesıeni óz erkimen almaǵan.
«Anyqtalǵan buzýshylyqtar negizinde qadaǵalaý organy aqyl-oıynyń kemistigine baılanysty áreketke qabiletsiz dep tanylǵan tulǵamen jasalǵan nesıe shartyn jaramsyz dep taný týraly talap aryzben sotqa júgindi. Sot sheshimimen prokýrordyń talaptary qanaǵattandyryldy, qaryz sharty jaramsyz dep tanyldy. Al áreketke qabiletsiz tulǵanyń quqyqtary qalpyna keltirildi», - dep atap ótti prokýratýranyń baspasóz qyzmeti.
Alaıaqtyq faktisi boıynsha sotqa deıingi tergeý bastaldy.
