Is-sharaǵa memlekettik organ ókilderi, Parlament depýtattary, Ulttyq banktiń birinshi tóraǵasy Ǵalym Baınazarov, ekonomıka salasyndaǵy sarapshylar, professor-oqytýshylar quramy jáne JOO stýdentteri qatysty.
Konferensııaǵa qatysýshylar ulttyq valıýtanyń tarıhy, Qazaqstan Respýblıkasynyń qarjy júıesiniń qazirgi jaǵdaıda jumys isteý máseleleri, eldiń ornyqty jáne tabysty damý quraly retindegi ulttyq valıýtanyń róli týraly baıandamalar jasady.
«Ulttyq valıýtany engizý elimizdiń tarıhyndaǵy mańyzdy kezeń bolyp tabylady. Teńge – táýelsizdik pen ekonomıkalyq turaqtylyqtyń sımvoly. Úsh onjyldyqta qazaqstandyq valıýta qalyptasý jáne damý jolynan ótti. Qazirgi jahandyq ózgerister jaǵdaıynda Qazaqstannyń qarjylyq qaýipsizdigi men ekonomıkalyq turaqtylyǵyn qamtamasyz etýdegi teńgeniń mańyzdy rólin atap ótý qajet. Konferensııa tájirıbe almasyp qana qoımaı, qarjylyq turaqtylyq, qarjy-nesıe saıasaty jáne álemdegi ulttyq valıýtanyń róli týraly egjeı-tegjeı talqylaýǵa múmkindik beredi dep sanaımyn», dedi L.N.Gýmılev atyndaǵy EUÝ rektory Erlan Sydyqov.
Konferensııa barysynda Ulttyq bankiniń birinshi tóraǵasy Ǵalym Baınazarov valıýtanyń qurylý tarıhy, qarjy júıesiniń qalyptasýyndaǵy qıyndyqtar men jetistikter týraly aıtyp berdi. Onyń aıtýynsha, ulttyq valıýtanyń 30 jyldyǵy – halqymyzdyń ómirindegi eleýli oqıǵa.
«О́zderińizge belgili, 1992 jyly Qazaqstanda ulttyq valıýtany jáne naryqtyq ekonomıkany qurý bastaldy. Bul jyldar erekshe boldy, óıtkeni álemdik negizgi úrdister ózgerdi, álemdik júıede ózgerister boldy. Bul ýaqytta elde naryqtyq ekonomıkanyń klassıkalyq teorııasyn eshkim zerttegen joq, eshkimniń jumys tájirıbesi bolǵan joq, sonymen qatar 1992 jyly ınflıasııa deńgeıi 2 960% qurady. Sol kezde ulttyq valıýta bolmasa, Qazaqstan ekonomıkasy daǵdarystan shyǵa almas edi. Teńgeniń bolashaǵy keremet bolady. Men AQSh dollary Qazaqstan úshin ınvestısııa quraly emes, bizdiń teńge bolady dep senemin», dep qorytyndylady ekonomıst.
Depýtat Berik Beısenǵalıev Parlament Májilisiniń tóraǵasy Erlan Qoshanovtyń quttyqtaý sózin oqyp berdi. Ol tarıhı turǵydan alǵanda, Qazaqstannyń qarjy-nesıe júıesi qurylǵan kúnnen bastap nebári 30 jyl ótkenin, biraq osy kezeńde qarjy sektory ekonomıkalyq órleýlerden, jańa qarjy ınstıtýttarynyń paıda bolýy jolynda daǵdarystar men synaqtardy bastan keshkenin aıta ketti.
Sondaı-aq tól teńgemizdiń mereıtoıy qarsańynda L.N.Gýmılev atyndaǵy EUÝ-da «Qazaqstan Respýblıkasynyń qarjy júıesi» jáne «Qazaqstan Respýblıkasy Ulttyq Bankiniń qyzmetin uıymdastyrý» degen atpen jaryq kórgen oqýlyqtardyń tusaýkeseri ótti.
«Qazaqstan Respýblıkasynyń qarjy júıesi» oqýlyǵyn L.N.Gýmılev atyndaǵy EUÝ ekonomıka fakýltetiniń ǵalymdary daıyndaǵan. Qazaq tilindegi jańa basylym Qazaqstan Respýblıkasynyń qarjy júıesiniń qalyptasýy men damýyna arnalǵan jáne 9 taraýdan turady. Oqýlyqtyń teorııalyq materıaly baqylaý suraqtarymen, usynylǵan ádebıettermen jáne glossarıımen tolyqtyrylǵan. Eńbek kópshilik oqyrman qaýymǵa arnalǵan.
«Qazaqstan Respýblıkasy Ulttyq Bankiniń qyzmetin uıymdastyrý» oqýlyǵynda L.N.Gýmılev atyndaǵy EUÝ avtorlar ujymy men Esil ýnıversıteti Ulttyq banktiń qalyptasýy men damý joldaryn qarastyrady. Kitapta eldiń ulttyq aqsha júıesin qalyptastyrý erekshelikteri týraly tarıhı materıaldar usynylǵan, ulttyq valıýta – teńgeni ázirleý, josparlaý jáne aınalymǵa engizý kezinde týyndaǵan qıyndyqtar kórsetilgen. Sondaı-aq, avtorlar ortalyq banktiń aqsha-kredıt saıasatyn júrgizý salasyndaǵy tájirıbesin usyndy.
Oqýlyqtar Qazaqstan Respýblıkasy Ulttyq bankiniń birinshi tóraǵasy Ǵalym Baınazarov pen ekonomıka ǵylymdarynyń doktory, EUÝ akademııalyq máseleler jónindegi prorektory, professor Serik Maqyshtyń jalpy redaksııasymen jaryq kórdi.
