«Bul esimdi atasy tańdady. «Eger kelinim qyz dúnıege ákelse, esimin Tomırıs qoıamyn. «Saq patshaıymy sekildi aqyldy, alǵyr, batyr bolyp óssin» dep júretin. Kelini «qyz bosandy» degendi estigende, «aıtqanym keldi» dep bir qýanǵan edi, «eldiń 20 mıllıonynshy azamaty atandy» degende, «nemeremniń ómirge kelýi tarıhı oqıǵaǵa aınalatynyn bilgendeı-aq, Tomırıs esimin tańdaǵan ekenmin» dep taǵy qýandy», deıdi sábıdiń ákesi Suńǵat Seıtjan.
Tomırıstiń atasy Aqylbek Ábdirahmanov áli 40-qa tola qoımaǵan jigit. Qazir «Qazaqmys» korporasııasyna qarasty №55 shahtada burǵylaýshy bolyp eńbek etedi. Ol zaıyby Gúlzat ekeýi úsh bala tárbıelep ósirip otyr. Úlkenderi – Suńǵat. Marhabaty – medkolledj stýdenti, al Asyljan 2-synypta oqıdy.
Suńǵat pen Áıgerim byltyr ǵana bas qosqan. Tuńǵyshtary jas ata-anasynyń esimderin qazirdiń ózinde tarıhqa endirip jatyr. О́ıtkeni ekeýi de bıyl 20 jasqa toldy. Ulytaý elimizdiń 20-óńiri sanalady. Al osy óńirdiń Tomırısi – elimizdiń 20 mıllıonynshy azamaty.
«Negizgi jumys ornym – «Ass-Seriktes» JShS, sol jerde órt sóndirýshimin. Biraq aılyq shaılyqqa jetpegendikten, kúzet kompanııasynda qosymsha jumys isteımin», deıdi jas áke.
Tomırıstiń nesibesi molynan eken. Sábı dúnıege kelisimen, estigen eldiń quttyqtamaǵany, kórimdik berip, shashý shashpaǵany joqtyń qasy. Oblys ákimi Berik Ábdiǵalıulynyń quttyqtaý haty men syı-sııapatyn arqalap oblys pen Jezqazǵan qalasynyń basshylary arnaıy kelip ketti. Quttyqtaýlar legi munymen tolastamasy anyq. Eń bastysy, Tomırıs ǵumyrly, baqytty bolsyn!
Jezqazǵan
