Kezdesý barysynda konsýl Úndistannyń Qazaqstandaǵy elshisi doktor Dr. T.V. Nagendra Prasad-tyń quttyqtaýyn jetkizdi.
Úndistandaǵy dástúrli Dıvalı merekesi jer betinde qaıyrymdylyqty nasıhattaıdy. Bul kúni álemde zulymdyq joıylyp, meıirim shýaqtaǵan. Osy qýanyshty kúni barlyq shańyraqta shyraq jaǵylyp, ómirdiń jaryq sátteriniń kóp bolýyna qatysty tilekter aıtylady. Mereke dástúrine sáıkes laýlap janǵan ot jer álemdegi nadandyqqa qatysty oıdy aýlaq ustap, júrekterge meıirim shýaǵyn tógedi.
Konsýl Swapnil Kothawade atap ótkendeı, Qazaqstan men Úndistan arasyndaǵy dostyq baılanystar búginde saıası-ekonomıkalyq, adamı qundylyqtarǵa negizdelgen mádenıet pen ádebıet, ónerge qatysty salalarda qarqyndy damyp keledi.
«Úndistan men Qazaqstan arasyndaǵy saýda, mádenı baılanystar tarıhy 2 myń jyldan asady. Al Qazaqstan óz Táýelsizdigin jarııalaǵan kezden bastap eki el osy yntymaqtastyǵyn bekemdeı tústi. Sońǵy jyldary Qazaqstanmen saýda strategııalyq baılanystar jaqsy jolǵa qoıyldy. Tabıǵı qazba baılyqtarǵa, mıneraldy qorǵa baı Qazaqstan Ortalyq Azııa aımaǵyndaǵy tartymdy elge aınalyp otyr. Búginde eki eldiń áskerı, tehnologııa, bilim, ǵylym, farmasevtıka jáne basqa da salalardaǵy yntymaqtastyǵy dostastyq kelisim-sharttary aıasynda jalǵasyn taýyp keledi», dep atap ótti konsýl.
Úndistannyń bilim men ǵylym salasyndaǵy ITEC, ICCR úkimettik baǵdarlamalary aıasynda Qazaqstan stýdentteri magıstratýra, doktorantýrada oqyp, kásibı biliktiligin arttyrý múmkindigine ıe. Al Úndistandyq stýdentter elimizdegi medısına, IT, ınjenerlik baǵyttaǵy joǵary oqý oryndarynda bilim alyp jatyr. Al bıylǵy jyly Nazarbaev ýnıversıtetine úndistandyq úsh stýdent doktorantýraǵa oqýǵa túsken.
Sonymen birge eki el arasyndaǵy ońtaıly vızaralyq baılanystar Úndistan men Qazaqstan azamattarynyń týrızm salasyna degen qyzyǵýshylyǵyn arttyra túsetini anyq. Osy oraıda Qazaqstannyń erekshe geografııalyq aýmaqta ornalasqandyǵy, taý baýraıyndaǵy Almaty sııaqty ásem qalanyń kórikti jerlerin qyzyqtaý úndistandyq týrıster úshin erekshe saıahat syılaıdy. Eki el arasyndaǵy uzaq jyldardaǵy jaǵymdy dostyq qarym-qatynas jaıynda Úndistannyń medıakommýnıkasııa salasy únemi habar taratyp otyrady. Búginde 30-dan astam oblystaǵy myńnan asa televıdenıede aǵylshyn, hındı jáne basqa da tilderde aqparat taratady. Osy oraıda medıkommýnıkasııa salasyndaǵy yqpaldastyqtyń damýy da memleketter jetistiginen turaqty habar taratyp otyrýǵa oń yqpal etetini anyq.
ALMATY
