Grýzııa Bas prokýratýrasynyń saıtynda jazylǵandaı, 14 qarasha kúni Tbılısıdegi Nıno Jvanııa kóshesinde ıtin serýendetip júrgen Grýzııa azamaty Gýram Elızbarashvılı men balasy oqıǵa ornyna jaqyn mańdaǵy balabaqshaǵa baratyn Qazaqstan azamaty arasynda janjal shyqqan. Grýzııalyq aqparat quraldarynyń habarlaýynsha, daýǵa er adamnyń balabaqsha aýmaǵynda ıtin serýendetýi sebep bolǵan.
Grýzııanyń bas prokýratýrasy qaqtyǵys kezinde Gýram Elızbarashvılıdiń Qazaqstan azamatyna qarsy qarýdan oq atqanyn málimdedi. Tártip saqshylary Gýram Elızbarashvılıdi oqıǵadan keıin birneshe saǵattan soń qazaqstandyq azamatty jaralaǵany úshin tutqyndaǵan. Aıǵaqty zat retinde qylmys qarýy aıyptalýshynyń áıeliniń anasynyń úıinen alynǵany atap ótildi.
Keıin Grýzııanyń Ishki ister mınıstrligi Qylmystyq kodekstiń densaýlyqqa qasaqana aýyr zııan keltirý jáne zańsyz qarý alyp júrýdi jazalaıtyn 117 jáne 236-baptary boıynsha tergeýdi bastady.
Tergeýden keıin Grýzııanyń bas prokýratýrasy Gýram Elızbarashvılıge qarsy aıyp taqty.
Departament atap ótkendeı, Gýram Elızbarashvılı buryn qasaqana kisi óltirgeni úshin sottalǵan.
«Janjal kezinde Gýram Elızbarashvılı S.M.-ǵa qaraı atys qarýynan birneshe ret oq atqan, nátıjesinde ol jábirlenýshiniń eki aıaǵyna kóptegen jaraqattar salǵan», - dep jazdy prokýratýra.
Vedomstvonyń málimetinshe, jábirlenýshige tıgen oqtyń biriniń nátıjesinde Gýram Elızbarashvılı abaısyzda tize aımaǵynan oq jaraqatyn alǵan.
«Grýzııa prokýratýrasy bir adamǵa qasaqana densaýlyqqa aýyr zııan keltirý, atys qarýy men oq-dárilerdi zańsyz alý, saqtaý jáne alyp júrý faktileri boıynsha aıyp taǵyldy», - delingen quqyq qorǵaý organynyń habarlamasynda.
Prokýratýra sotqa aıyptalýshyǵa qatysty zańmen belgilengen merzimge bultartpaý sharasy retinde bas bostandyǵynan aıyrýdy qoldanýdy surap shaǵymdandy. Grýzııanyń Ishki ister mınıstrliginde qylmystyq tergeý jalǵasýda.
