18 qarashada Astanada qolaısyz aýa raıy boldy: jeldiń jyldamdyǵy keı ýaqytta sekýndyna 23 metrge deıin jetti.
Qutqarýshylar elorda turǵyndary men qonaqtarynyń kóshege shyqpaý kerektigin eskertip, málimdeme jasady.
"Balalardy erekshe baqylaýda ustaý jáne olardy qaraýsyz qaldyrmaý mańyzdy. Kóshede qatty jel kezinde jer asty ótkelderin nemese qurylystardyń kireberisterin panalaýǵa keńes beremiz. Úı qabyrǵalarynyń janyna qatty jelden jasyrynbaý kerek, óıtkeni shatyrlardan shıfer men plıtalar qulap ketýi múmkin», delingen Tótenshe jaǵdaılar departamentiniń habarlamasynda.
Astana turǵyndaryna elektr jelileri men jylytý peshteriniń jaı-kúıin tekserip, ishki jáne syrtqy órtke qarsy sý qubyrynyń, telefon baılanysynyń jaramdylyǵyn qamtamasyz etý, órtke qarsy quraldardy daıyndaý usynylady.
Sonymen qatar, Tótenshe jaǵdaılar departamenti úıdiń nemese páterdiń barlyq terezelerin myqtap jabý kerektigin atap ótti. Úı-jaıda bolǵan kezde terezeden alshaq turyp, elektr quraldaryn paıdalanbaǵan durys.
«Eger páterde elektr jelisinde kerneýdiń joǵarylaýy oryn alsa, siz bolmaǵan kezde kenetten elektr jaryǵy qosylyp ketse, órt shyqpaýy úshin barlyq elektrlik turmystyq qurylǵylardyń qýatyn dereý óshirińiz, ashalardy rozetkadan ajyratyńyz. Qurylys alańdary halyq pen aýmaqty qolaısyz aýa raıynyń áserinen qorǵaý úshin qosymsha sharalar qabyldaýy kerek», dep qosty qutqarýshylar.
Tótenshe jaǵdaı týyndaǵan jaǵdaıda 112 nómirine táýlik boıy habarlasýǵa bolady.
Buǵan deıin Qazaqstanda qar men boran saldarynan joldar jabyla bastaǵany bolatyn.
