Infografıkany jasaǵan – Záýresh SMAǴUL, «EQ»
JOLTAP jobasy Memleket basshysynyń ónimdi jumys oryndaryn qurýǵa basa nazar aýdara otyryp, belsendi áleýmettik saıasattyń qajettiligi týraly tapsyrmalaryn oryndaý maqsatynda bastalǵan. Bul bastama elorda ákimdigi men birqatar múddeli memlekettik organnyń qoldaýymen iske asyrylyp otyr. Jobanyń birlesken seriktesi – «Jańa múmkindik» qoǵamdyq qory, al modýldik pýnktterge «Halyq» qory qoldaý kórsetken.
Jobanyń «Freelance múmkindik» oqytý júıesi bir aıdy qamtıdy. Baǵdarlama uıymdastyrýshylarynyń aıtýynsha, bilim alýǵa ótinish bildirgenderdiń 60 paıyzdan astamy – elordanyń 35 jasqa deıingi jumyssyz turǵyndary. Astana ákimdiginiń málimetinshe, ekinshi lektiń 215 qatysýshysy 7 sıfrlyq daǵdy boıynsha oqýǵa kirisken. Máselen, SMM (oqý merzimi – 2 apta), targetolog (oqý kezeńi – 1 aı), beınograf (oqý kezeńi – 1,5 aı), marketpleıs (oqý merzimi – 2 apta), mobılograf (oqý kezeńi – 1 aı), grafıkalyq dızaıner (oqý merzimi – 1,5 aı), veb-dızaıner/saıttardy ázirleý (oqý merzimi – 1,5 aı). Baǵdarlama aıasynda jyl sońyna deıin 500 azamatty 7 ózekti mamandyq boıynsha úıretý josparlanǵan.
– Astana turǵyndarynyń damýǵa ári kásibı ósýge talpynysy joǵary. Azamattar oqýǵa, daǵdylardy úırenýge, bıznes ashýǵa qyzyǵýshylyq tanytyp otyr. JOLTAP jobasy arqyly 10 myń Astana turǵyny jumysshy jáne sıfrlyq mamandyqtary boıynsha oqyp, sertıfıkattalǵan maman atanady. Joba – memleket, bıznes jáne qoǵamnyń birlesip bastaǵan tıimdi júıesi. Biz jańa seriktestikter men áriptestikke ashyqpyz, – deıdi joba jetekshisi Dana Júnisova.
Qysqamerzimdi oqytýǵa jazylý «Barshaǵa múmkindik» modýldik pýnktterinde ótedi. Bul pýnktterde elorda turǵyndary jumys jáne sıfrlyq daǵdylardy ıgerý boıynsha tegin keńes alady, sondaı-aq memlekettik qoldaý sharalary men jumysqa ornalasý múmkindikteri týraly aqparat ala alady. Modýldik pýnktterdiń keńesshileri turǵyn úı baǵdarlamalary, bıznesti qoldaý, ataýly áleýmettik kómek, oqytý jáne eńbekpen qamtý máseleleri boıynsha jan-jaqty aqparat beredi. «Barshaǵa múmkindik» modýldik pýnktteri arqyly azamattar 52 memlekettik qoldaý sharasy boıynsha kómek alyp jatyr. Onyń ishinde bıznes ashý úshin grant pen shaǵyn nesıe berý baǵdarlamalaryna qatysýǵa 720 adam ótinish bergen.
Jastar úshin sıfrlyq daǵdylardy meńgerý tabysty mansaptyń ajyramas bóligine aınaldy. Sıfrlyq daǵdylar jańa múmkindikter álemine jol ashady jáne eńbek naryǵynda artyqshylyq beredi. Oqý aıaqtalǵannan keıin qatysýshylar sertıfıkat alady, al olardyń kandıdatýralary JUMYS TAP Telegram-botynda jarııalanady. Búginge deıin joba aıasynda 3 myńnan asa azamatqa keńes berilipti.
«Freelance múmkindik» qysqamerzimdi oqytý baǵdarlamasy «Target» kýrsynyń qatysýshysy Danagúl Alpysbaıqyzy – kópbalaly ana. Ol joba týraly qurbysynan estip, memlekettik qoldaý sharalary boıynsha keńes alýǵa barǵan. Al qazir sıfrlyq daǵdylardy ıgerý boıynsha tegin bilim alyp júr.
– О́zim – bes balanyń anasymyn. Buryn memlekettik mekemede jumys istegenmin. Qazir úsh balam balabaqshaǵa barady, olardy aparyp, ákeletin adam joq. Sondyqtan jumystan shyǵýyma týra keldi. Úıde qarap otyrmaıyn dep ylǵı jańadan shyqqan onlaın kýrstardy satyp alyp júrdim. Aqyly túrde mobılografııa, SMM kýrstaryn oqydym. JOLTAP jobasy aıasynda maǵan zaman aǵymyna saı «Target» kýrsy qyzyǵyraq kórindi. Dostarymyzdyń da kásibi bar, múmkin olarǵa da paıdam tıer. Kýrsty jaqsy meńgerip, targetolog bolyp jumys istegim keledi. Bul qolymnan keledi dep oılaımyn, – deıdi qatysýshy.
Danagúldiń aıtýynsha, targetolog mamandyǵy boıynsha oqý basqa mamandyqtarǵa qaraǵanda qıynǵa túsip otyr. Alaıda bastapqy 3 sabaqtyń ózinen kóp málimet alǵanyna qýanyshty.
Jobanyń taǵy bir qatysýshysy Natalıa Gýbar kýrs óte tıimdi ekenin aıtady.
– Men mobılografııa kýrsynda oqımyn. Bizge vıdeolardy montajdaý jáne ártúrli effektilerdi qoldaný úıretildi. Bul oqýdy óte jaqsy kóremin. О́zim rıeltormyn, áleýmettik jelilerde óz qyzmetimdi tanystyrý úshin mobılografııa qajet. Meniń oıymsha, bul kýrs óte paıdaly bolady. Keıbir áıelder tipti balalarmen sabaqqa keledi, sol sııaqty jaqynda zeınetke shyqqandar da aramyzda bar», – deıdi ol.
Astana qalasy ákimdiginiń mamandary JOLTAP jobasy arqyly qaladaǵy jumyssyzdyq problemasyn sheshýde jaqsy múmkindikterge jol ashylady dep otyr.
JOLTAP jobasynyń baspasóz qyzmeti birneshe jerde ornalasqan «Barshaǵa múmkindik» modýldik pýnktterinde azamattardyń memlekettik qoldaý sharalary jóninde keńes alyp, oqýǵa jazyla alatynyn habarlady. Mundaı oryndar – Ailand ODO, Qorǵaljyn tasjoly, 2; Magnum sýpermarketi, Edil kóshesi, 26; Jastar saraıy, Respýblıka dańǵyly, 34; «Tulpar» SO, Sh.Ýálıhanov kóshesi, 24; Euromall SÚ, Qosshyǵululy kóshesi, 24; «Vstrecha» SÚ, Abylaı han dańǵyly, 31; Mechta SÚ, Syǵanaq kóshesi, 3; «Azııa park» SOO, Qabanbaı batyr dańǵyly, 21; «Saıanur» bazary, Tilendıev dańǵyly, 24/5; «Big Shanhaı» bazary, Alash tasjoly, 32a mekenjaılarynda.
Qysqa merzim ishinde zamanaýı mamandyqtyń ıesi atanyp, jumysqa ornalasýǵa múmkindik beretin joba á degennen-aq qala turǵyndarynyń suranysyna ıe bolyp otyr. Joba kelesi jyly da jalǵasyn tappaq. Uıymdastyrýshylar baǵdarlama aıasynda 2024 jyly 3 myńdaı adamdy oqytýdy josparlap otyrǵanyn aıtady.
