– Máselen, Qaraǵandy qalasynda alaıaqtyń qurbany bolǵan jábirlenýshiden jaýap alý barysynda ol: «Men alaıaqtardyń qandaı tásildermen azamattardy aldaıtynynan habardar boldym. Bul týraly birneshe ret telearnalardan da aqparattar berildi. Alaıda bunyń maǵan qatysy bolmaıdy dep oıladym», dedi. Qazirgi ýaqytta respýblıka boıynsha telefon jáne ınternet-alaıaqtyǵynyń aldyn alý is-sharasy ótkizilip jatyr. Mysaly, Qaraǵandy qalalyq polısııa basqarmasynyń «Kıberpol» qyzmetkerlerimen qaladaǵy mekemelerdiń birine hakerlik shabýyl jasaǵan Temirtaý qalasynyń turǵyny ustaldy. Ol vırýsty baǵdarlamalardy paıdalaný arqyly mekemeden 63 mln teńge aqsha jymqyrǵan. Qazirgi ýaqytta kúdikti ustalyp, onyń basqa da qylmystarǵa qatysy bar-joǵy tekserilip jatyr, – dedi Qaraǵandy oblystyq polısııa departamenti bastyǵynyń orynbasary Ábil Ábildın.
Sondaı-aq spıkerdiń aıtýynsha, Temirtaý qalalyq polısııa basqarmasynyń qyzmetkerlerimen ózderin polısııa qyzmetkerimiz dep tanystyryp, jalǵan qyzmettik kýálik kórsetip, eldi aldaǵan alaıaqtar toby ustalǵan. Kúdiktiler turǵyndarǵa 7 mln teńge kóleminde shyǵyn keltirgen. Olar ustalyp, ýaqytsha ustaý ızolıatoryna qamaldy. Sonymen qatar qaraǵandylyq polıseıler Almaty qalasynda kórshiles eldiń azamatyn ustady. Ol ózin bank qyzmetkerimin dep tanystyryp, turǵyndardan 35 mln teńge aqsha jymqyrǵan. Kúdikti qamaýǵa alyndy. Tergeý amaldary júrgizilip jatyr.
