Qazir atalǵan nysanda jóndeý jumystary tapsyrys berýshiniń kelisiminsiz jıyrma kúnnen asa ýaqytqa toqtatylǵan. Basqarma tarapynan jóndeý jumystaryn jandandyrý jóninde birneshe ret eskertý de joldanǵan. Osyǵan qaramastan merdiger uıym óz mindetine tek qazan aıynda ǵana qaıta kirisken. Sonymen qatar tehnıkalyq qadaǵalaý uıymy tarapynan da eskertýler berilgenimen, merdiger buǵan qulaq aspaǵan.
Baızaqov kóshesiniń boıyndaǵy Gogol kóshesinen bastap, Raıymbek dańǵylyna deıingi bóliginiń betki qabaty 24 tamyzda tapsyrys berýshige eskertýsiz, tıisti jol belgilerimen qosa qyryp tastalǵan. Osylaısha, qazirgi kezde bul kósheniń atalǵan bóligi kólik pen jaıaý júrginshiler úshin qaýipti bolyp tur.
Kelisimshart talaptaryna sáıkes tapsyrys berýshi ekinshi taraptyń óreskel qatelikterine baılanysty mámileni bekitilgen merziminen buryn buzýǵa quqyly. Kelisimshart talaptaryn buzýǵa tapsyrys berýshiniń kelisiminsiz jumystardy 15 kúnnen artyq uzaqqa toqtatý da kiredi. Sondyqtan jol qaýipsizdigi men qala turǵyndarynyń jaılylyǵyn qamtamasyz etý maqsatynda basqarma qoldanystaǵy zańnama aıasynda shara qoldanýǵa nıettenip otyrǵan jaıy bar. Memlekettik satyp alýlar týraly zańǵa sáıkes tapsyrys berýshi tarapynan kelisimshartty birjaqty buzý týraly eskertý joldanyp, oǵan qosa aıyppul salý da qarastyrylǵan.
Kólik qozǵalysynyń jıiligin eskere otyryp jáne apattyq jaǵdaılardyń aldyn alý maqsatynda Gogol kóshesinen Raıymbek dańǵylyna deıingi bóliktiń ortasha jóndeý jumystaryn kásiptiń áleýmettik jaýapkershiligi aıasynda ózge merdiger uıymdar aıaqtaıdy.
Eske sala ketsek, bıyl Almatyda jalpy 200 shaqyrym joldy ortasha jóndeý josparlanǵan. Qazir negizgi magıstraldy kóshelerdegi jumystar aıaqtaldy. Injenerlik jelilerdi uıymdastyrý jumystary ýaqtyly aıaqtalǵan jaǵdaıda aýdandyq mańyzy bar joldardaǵy jóndeý jumystaryn qarasha aıynyń sońyna deıin bitirý josparlandy. Osylaısha, jyl qorytyndysy boıynsha jaqsy jáne qanaǵattanarlyq sapadaǵy jol úlesin 86%-dan 89%-ǵa deıin kóterý kózdelip otyr.
ALMATY
