Foto: parlam.kz
«Memleket basshysy Q.Toqaev elimizdiń damýyna baǵyttalǵan jańǵyrtý saıasatyna sáıkes qulaq asatyn úkimet qaǵıdasynyń oryndalýyna aıyryqsha mán berip otyr. Bul ár azamattyń qoldaýyna ıe bolyp, jer-jerde ózekti máselelerdiń tıimdi sheshilýine yqpal etýde. Oǵan óńirlerde saılaýshylarmen kezdesýde ózimiz de kýá bolyp, jurtshylyqtyń jyly pikirin estip júrmiz. Dese de keıbir qordalanyp qalǵan máselelerdiń túıinin shuǵyl sheshýge suranyp turǵan jaǵdaılar da bar. Buǵan Jambyl oblysynyń ortalyǵy Taraz qalasyndaǵy «Kóne Taraz» mýzeı ǵımaratynyń jaı-kúıin aıtýǵa bolady. Bul ǵımarat 2015 jyly qazaq handyǵynyń 550 jyldyǵyna oraı ári kóne qalanyń kórkine kórik qosyp, halyqaralyq týrızmdi damytý maqsatynda salynǵan edi. Jańa qurylysqa memlekettik bıýdjetten 950 mıllıon teńge qarjy jumsalǵany buqaralyq aqparat kózderinde de, oblystyq máslıhat jıynynda da ashyq aıtyldy. Mereke aıasynda respýblıkalyq deńgeıdegi mártebeli basshylar men qonaqtardyń qatysýymen «Kóne Taraz» ǵımaraty saltanatty túrde ashylǵanda kópshiliktiń qýanyshynda shek bolmady. Sol kezde mádenıet mınıstrligi eń baǵaly tarıhı eksponattardy osy mýzeıge ákep qoıdy. Alaıda bul kóz aldaý ǵana boldy. Ataǵy dúrkiregen mýzeı bir apta óter-ótpesten esigin tars jaýyp tastady. Sebebi ǵımarat jaramsyz, jańbyr sýy ótip elektr jaryqtary múldem isten shyqty. Jergilikti ákimdik qosymsha qarjy jumsap jóndegennen túk ónbedi. Sodan beri segiz jyl ótti. Osy aralyqta oblys ákimi men salalyq mınıstrlikte birneshe márte aýys-túıis boldy. Mýzeı ǵımaraty bosqa qańyrap tur», dedi Májilis depýtaty.
Osy máseleni kóterip talaı ret dabyl da qaǵylǵanymen naqty sheshim qabyldanbaǵanyn aıtty. Áldeqandaı jobalyq, qarjylyq joba ázirlenýde degenmen de esh qaıran bolmaı turǵanyn jetkizdi. Osy kózboıaý joba úshin memleket qazynasynan jumsalǵan 1 mıllıard teńgege jýyq qarajat qumǵa sińgen sýdaı bolǵanyna qynjyldy.
«Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly zańda jergilikti atqarýshy organdarǵa tarıhı-mádenı murany paıdalaný, kútip ustaý, qorǵaý jáne qalpyna keltirý jumystaryn uıymdastyrý júktelgen. Alaıda zańda kórsetilgen quziret pen talaptar sonymen qatar murajaı ornalasqan ǵımarattyń qazirgi kúngi jaǵdaıy qatty qynjyltady. Bul sanattaǵy ǵımarat negizinen mádenıet mınıstrliginiń qaraýynda bolýy kerek edi. Biraq jaramsyz qalpyndaǵy ǵımaratty qabyldaı almasa da is-shara qoldanýǵa múddelilik tanytýǵa tıisti emes pe? Premer-mınıstrdiń orynbasarynan kezinde osy mýzeı ǵımaratyn qabyldap alǵan Jambyl oblystyq ákimdiginiń áreketine ádil, quqyqtyq baǵa berý, laýazymdy jáne tıisti ókilettiligi bolǵan qyzmetkerlerdiń jaýapkershiligi naqtylanýyna, murajaı ǵımaratynyń máselesi oń sheshilýine yqpal etýińizdi suraımyn. Laýazymdy jáne tıisti ókilettiligi bolǵan qyzmetkerlerdiń jaýapkershiligi naqty qaralýyna, murajaı mártebesiniń aıqyndalýyna, ǵımarattyń taǵdyryn oń sheshýge yqpal etýdi suraımyn», degen depýtat buny júzege asyrý ádiletti Qazaqstan qurýdyń maqsat-múddesi ekenin jetkizdi.
