Foto: Polisia.kz
Batys Qazaqstan oblysy Báıterek aýdany, Prıýral polısııa bóliminiń kezekshisine áıel adam qońyraý shalyp, qart ákesin tonap ketkenin habarlaǵan. «Oqıǵa ornyna dereý jedel-tergeý toby men ýchaskelik polısııa ınspektory jiberildi. Dabyl boıynsha polısııa bóliminiń barlyq jeke quramy jumyldyryldy. Oqıǵa ornyna bara jatqan jolda ýchaskelik polısııa ınspektory jol boıynda eki jigitti baıqaıdy, biraq jigitter polısııa qyzmetkeriniń olarǵa qaraı bet alǵanyn baıqap, qashyp ketedi. Alaıda polısııa qyzmetkeri bireýin tanyp úlgeredi. Oqıǵa ornyna jetken polıseıler tekserý jumystaryn júrgizý barysynda belgisiz eki jigittiń egde jastaǵy erli-zaıyptylar turatyn úıge kirip, er adamǵa dene jaraqatyn salyp, ony tonap, 190 myń teńge kólemindegi aqshasyn urlap ketkenin anyqtady. Jedel-izdestirý is-sharalary nátıjesinde polısııa qyzmetkerleri 18 jáne 17 jastaǵy eki jigitti Darııan aýylynda qolǵa túsirdi. Onyń biri jábirlenýshiniń óz nemeresi bolyp shyqty», delingen aqparatta.
Nemeresi dosymen birge atasy turǵan úıge kelip terezeden ishke engen. Kúdiktiler qarııany qulatyp qaltasyndaǵy qomaqty qarajatyn alyp ketken. Jábirlenýshiniń nemeresine erip kelgen kúdiktiniń qaltasynan tapansha men jınalmaly pyshaq tabylǵan. Báıterek aýdandyq polısııa bóliminiń ýaqytsha ustaý ızolıatoryna qamalǵan ekeýdiń ústinen QK-niń 192-baby 3-bóligi (Qaraqshylyq) boıynsha sotqa deıingi tergeý amaldary júrgizilip jatyr.
