Qazaqstan azamattarynyń qaýipsizdigin qamtamasyz etetin standarttardy jetildirý boıynsha jumys belsendi jalǵasyp jatyr.
«Saýda jáne ıntegrasııa mınıstrligi Tehnıkalyq retteý jáne metrologııa komıteti tóraǵasynyń buıryǵy boıynsha, QazStandart ázirlegen, «Jol qozǵalysyn retteýdiń tehnıkalyq quraldary. Qoldaný erejeleri» ST 1412-2017 ulttyq standartyna tolyqtyrýlar engizildi. О́zgerister 2024 jyldyń 1 qańtarynan bastap kúshine enedi», dep habarlady QazStandart baspasóz qyzmeti.
О́zgeris lep belgisi jáne «GAS» degen jazýy bar qara jıekti sary tústi gaz ballon jabdyǵy bar avtomobılderge arnalǵan belgini mindetti túrde ornalastyrýdy engizedi.
Jańa erejeler sonymen qatar gazben júretin kólikterdiń jabyq turaqtarda turýyn tıimdi baqylaýǵa jáne tyıym salýǵa múmkindik beredi, bul saıyp kelgende, azamattardyń jalpy qaýipsizdigine yqpal etedi.
Esterińizge sala keteıik, 2019 jyldyń 29 jeltoqsanynan bastap qaýipsizdik maqsatynda gaz jabdyǵymen jabdyqtalǵan avtokólikterge jabyq turaqtarǵa kirýge tyıym salynǵan. Avtokóliktegi suıytylǵan gaz durys ornatylmaǵan bolsa, eń az ushqyn jarylys týdyrýy úshin jetkilikti, ol turaqtaǵy kórshi kólikterdi zaqymdap qana qoımaı, jaqyn mańdaǵy adamdarǵa da zııan keltirýi múmkin.
Keıinirek, 2020 jyly Ishki ister mınıstrligi gaz ballondyq jabdyqpen jabdyqtalǵan avtokólikterdi taný belgisin ázirledi.
