Baıqaýdyń ózi Aqan seriniń 180 jyldyǵyna arnalǵandyqtan oryndaýshylar bir ándi onyń shyǵarmalarynan shyrqady. Aqannyń «Kókjendet», «Qaratorǵaı», «Aqtoqty», «Maqpal», «Altybasar», «Áýdemjer», «Maıdaqońyr» sııaqty ondaǵan tamasha áni bolsa da, baıqaýǵa qatysqandardyń kóbi seriniń «Qulager» ánin aıtty. Qalǵan eki án ózderiniń qalaýyndaǵy kompozıtorlardyń ánderi boldy.
Oryndaýshylardyń arasynan adamnyń qulaq quryshyn qandyryp, tula boıdy titiretetin arqaly, «qulaqtan kirip boıdy alyp» jan-júıeni tebirentetin ánshilerdi kóre almadyq. Bári de ánderdiń notaǵa jazylǵan kúıine keptelip qalǵandaı eken. Tragedııalyq ánderdi de, kóńildi ánderdi de bir sarynmen aıtý basym. Sondyqtan «Qulagerden» de Aqannyń tereń qaıǵysyn estı almadyq. Biz jergilikti aıtýly ánshi, osyndaı talaı baıqaýlarǵa qatysyp, jeńimpaz bolǵan Dásten Baımuqanovty áńgimege tartqanymyzda, ol da sony aıtty. «Ánshiler qalyptan shyǵa almaı tur, bári de notany buzbaýǵa tyrysady. Qazaq ánshileri olaı aıtpaǵan. Ándi shyrqaǵan kezderinde tula boıy birge tolqyp, kózi oınaqshyp, arqasy qozyp turýy kerek qoı. Sonda ǵana án túrlenip, tyńdaýshynyń jan-dúnıesin tolqytady», dedi ol.
43 ánshiniń arasynan ádil qazylar júırik dep tanyǵan 18 ánshi ekinshi kezeńge shyqty. Olardyń arasynan Qazaqstan Qarýly kúshteri Ulttyq áskerı-patrıottyq ortalyǵynyń ánshisi Dáýrenbek Islámǵalı bas júldeni jeńip aldy. Birinshi oryndy qyzyljarlyq Oljas Suraǵanov qanjyǵasyna bókterdi. Eki ekinshi orynnyń báıgesin aqtaýlyq Adaı Ázimhan jáne Astanadaǵy R.Baǵlanova atyndaǵy Halyq qazynasy ulttyq óner ortalyǵynyń ánshisi Asqar Muqııat ıelendi. Al úshinshi oryndy Súıinbaı atyndaǵy Almaty oblystyq fılarmonııasynyń ánshisi Maǵjan Satybaldy, jetisýlyq Qabdel Qaster, oraldyq Mırlan Jambylov aldy. Sonymen qatar tańdaýly ánshilerge qazylar alqasynyń sheshimimen Kákimbek Salyqov, Moldahmet Tyrbıuly, Igibaı Álibaev, Musa Asaıynov atyndaǵy arnaıy júldeler berildi. Báıge alǵandardyń bári baǵaly syılyqtarǵa ıe boldy. Qazylar alqasynyń qatarynda Qazaqstannyń eńbek sińirgen qaıratkerleri, pavlodarlyq Erbol Aıtbaev, almatylyq Nurjan Janpeıisov, qaraǵandylyq Dáýrenbek Árkenov, «Qurmet» ordeniniń ıegeri Qaırat Kákimov, Mádenıet salasynyń úzdigi, qyzyljarlyq Birjan Esjanov boldy. Baıqaýdyń ádil sheshimin shyǵarǵan olarǵa oblys ákiminiń Alǵys haty jáne «Aqan seriniń 180 jyldyǵy» mereıtoılyq tósbelgisi tapsyryldy.
Baıqaýdyń sońynan júldegerler qatysqan gala-konsert boldy. Sóıtip, Qyzyljar turǵyndary halyq ánderin estip, bir serpilip qaldy.
PETROPAVL
