«Kóne Taraz» etnomádenı kesheniniń kórme zalynda uıymdastyrylǵan saltanatty is-sharaǵa óńir basshysy Erbol Qarashókeev arnaıy qatysyp, mádenıet salasy qyzmetkerleriniń eren eńbegine laıyqty baǵa berdi. Sondaı-aq oblys ákimi birneshe aıǵa sozylǵan mádenıet kúnderiniń mańyzyna toqtaldy.
«Ásilinde, mádenıetsiz el de, ult ta bolmaıdy. Ulttyq dástúr, óner, rýhanııattyń berik negizi mádenıet salasymen astasyp jatqanyna eshkimniń talasy joq. О́ńir damýyndaǵy aıryqsha mańyzǵa ıe salany jańǵyrtý maqsatynda «Mádenıet – asyl qazynam» atty mádenıet kúnderi barlyq aýdanda ótkizildi. Kópshilikke óńir tarıhy tanystyrylyp, dástúrli ónerimiz nasıhattaldy.
Salada budan ózge de atqarylǵan jumys az emes. Máselen, «О́ner kózi – halyqta» atty óner ujymdarynyń festıvali qolǵa alynyp, «Eń úzdik» aýyldyq mádenıet úıi men ádistemelik kabınetter irikteldi. Nátıjesinde, jumys jandana tústi. О́ner ujymdarynyń jańashyldyqqa degen umtylysy aıqyn baıqaldy.
Jambyl óńiri – Yqylas Dúkenuly, Jambyl Jabaev, Kenen Ázirbaev, Aıaz Betbaev syndy ulttyq rýhanııatqa, mádenıetimizge mol mura qaldyrǵan tarıhı tulǵalardyń shyǵarmalaryn keńinen dáriptep kele jatqan tarıhı ólke. Olardan ózge de talaı óner ıeleri óńir mádenıetiniń órkendeýine ólsheýsiz úles qosty. Árqaısysy bir taýǵa aınalǵan mádenıet maıtalmandaryna degen qurmet, iltıpat, izet degen eshqashan tolastamaq emes.
Yqylym zamannyń izin jalǵaıtyn urpaqtar sabaqtastyǵyn qalyptastyrý – qashanda ózekti. Osy oraıda Memleket basshysy Qasym-Jomart Kemeluly Toqaev Ulttyq quryltaıda sóılegen sózinde «Halqymyzdyń ata-babadan mıras bolǵan mol murasy bar. Ony zaman talabyna saı jańǵyrtyp, jer júzine nasıhattaý kerek», dep atap ótken bolatyn.
Reti kelip turǵanda aqjoltaı habardy jetkizýdi jón sanadym. Kelesi jyly oblysymyzda «Aıtysker aqyndar men jyrshy-termeshiler ortalyǵy» ashylady. Bul ortalyq ta óńir mádenıetiniń órkendeýine súbeli úles qosady dep esepteımin.
Ulttyq mádenıet pen ónerdiń damýyna, rýhanı baılyǵymyzdyń eselene túsýine ólsheýsiz úles qosyp júrgen barsha mádenıet qyzmetkerlerine sheksiz alǵys bildiremin. Árqashan eseli eńbektiń jemisin kórip, jańa bıikterdi baǵyndyra berińizder», dedi E.Qarashókeev.
Is-shara sońynda «Mádenıet – asyl qazynam» atty oblys aýdandarynyń mádenıet kúnderinde úzdik ónerimen daralanǵan Shý aýdanynyń ujymy I oryn ıegeri atandy. Derekke sensek, atalǵan aýdan ákimi Baqytjan Jánibekov aýdan ónerpazdarynyń joǵary deńgeıde óner kórsetýine bar múmkindiginshe qoldaý kórsetipti. Nátıjesi baıqaý qorytyndysynan baıqalyp tur. Jeńistiń bıik tuǵyrynan kóringen shýlyqtarǵa shaǵyn avtobýs buıyrdy. Baıqaý qorytyndysyna zer salsaq, júldeli II oryn alǵan qordaılyqtar da avtokólikke ıe boldy. Al úzdik úshtikti qorytyndylaǵan Merki jáne Moıynqum aýdandarynyń ónerpazdaryna 1 komplekt mýzykalyq qurylǵylar tapsyryldy. О́zge aýdandarǵa yntalandyrý júldesimen birge 5 dombyradan berildi.
Sońyra «Halyqtyq» ataǵy bar kórkemónerpazdar ujymdarynyń deńgeıin anyqtaý, halyq shyǵarmashylyǵy janrlaryn damytý maqsatynda ótken «О́ner kózi – halyqta» oblystyq festıvaliniń «Úzdik bı ujymy», «Úzdik hor ujymy», «Úzdik án-bı ansambli», «Úzdik aspaptyq, folklorlyq ansambli» atalymdarynyń jáne «Eń úzdik aýyldyq mádenıet úıi, klýb-2023», «Eń úzdik ádistemelik kabınet» oblystyq baıqaýlarynyń jeńimpazdary men júldegerleri marapattalyp, qomaqty qarjylaı syılyqtar tabystaldy.
Jambyl oblysy
