Foto: gov.kz
Ǵylym jáne joǵary bilim mınıstrliginiń baspasóz qyzmeti málimetinshe osy kúnderi D.Snoý Hımııa jáne hımııalyq tehnologııa kafedrasynyń meńgerýshisi Marjan Qalmahanovamen birlesip Jambyl oblysyndaǵy sý aǵyndaryn zertteý jobasy boıynsha jumysty bastap ketken. Atalǵan ǵylymı jobany AQSh bilim mınıstrligi qarjylandyratyny kútilip otyr. Nátıjesinde AQSh-tyń doktoranttary men magıstranttary M.Dýlatı ýnıversıtetine kelip, sýdyń hımııalyq quramyn zertteý baǵytynda jumys júrgizip, tájirıbe almasatyn bolady.
Daniel Snow men Marjan Qalmahanova Asa aýyly mańyndaǵy turmystyq qaldyqtan jıylǵan sýdyń quramyn anyqtaý maqsatynda úsh aı eksperıment júrgizip, úlgisin Nebraska ýnıversıtetine jiberdi. Nátıjesinde quramynda adam densaýlyǵyna qaýip tóndiretin zııandy qospalar anyqtalǵan. Endi fıltrasııalyq júıe ornatý jumystaryn atqarý josparlanyp otyr.
«Jambyl oblysyndaǵy úlken problema – fıltrasııalyq júıeniń bolmaýy. Qalanyń barlyq turmystyq sýy Asa eldimekeni mańyna baryp quıady, jerge sińgen zııandy sýdy qaıtadan ózimiz tutynamyz», deıdi Marjan Qalmahanova.
Daniel Snow «ǵylymdy klımattyq ózgeriske baǵyttaý kerek, sýdyń, aýanyń tazalyǵyn únemi zerttep, ony jaqsartý boıynsha jumysty jetildirý asa qajet», deıdi.
Ýnıversıtetter yntymaqtastyǵy halyqaralyq deńgeıde qyzmet etýdiń tıimdi múmkindikterin kórsetedi, el múddesi úshin qoldanbaly ǵylymı-zertteý ázirlemelerin júrgizýge jol ashady.
