«Otandyq ǵylym men joǵary bilim berý salasynda taǵy da jaǵymdy jańalyq oryn aldy. Naqty aıtsam, Almatyda elimizdiń Ǵylym jáne joǵary bilim mınıstrliginiń bastamasymen Sátbaev ýnıversıteti janynan Gonkong CityU qalalyq ýnıversıtetiniń fılıalyn ashý týraly kelisimge qol qoıdyq. Bul QS reıtıngi boıynsha 70-orynda turǵan álemdegi eń úzdik ýnıversıtetterdiń birinde elimizdiń zeıindi jastarynyń bilim alýyna zor múmkindik bolmaq», dep jazdy mınıstr.
Vedomstvo basshysynyń málimdeýinshe, CityU ýnıversıtetiniń biregeı tájirıbesi men tarıhy qazirgi jahandyq eńbek naryǵynyń talaptaryna saı beıimdelgen joǵary bilimdi qysqa merzim ishinde damytýdyń tıimdi modelin qalaı qalyptastyrýǵa, sondaı-aq ǵylym men ınnovasııany damytý arqyly qandaı tabystarǵa jetýge bolatynyn kórsetedi.
«Akademııalyq jetistikterge jetý úshin Qazaqstan álemdik úzdik tájirıbeni qabyldaýǵa árqashan daıyn. Biz osy ýaqytqa deıin 6 sheteldik joǵary oqý ornynyń fılıalyn ashtyq, bul statıstıkany odan ári ósirip, sheteldik áriptesterimizdiń sanyn arttyrýdy josparlap otyrmyz. Memleket basshysy atap ótkendeı, biz munaı-gaz sektory, energetıka, aýyl sharýashylyǵy, kólik jáne logıstıka sııaqty mańyzdy salalarǵa jasandy ıntellekt tehnologııalaryn engizýge basa nazar aýdarýymyz kerek. CityU men Sátbaev ýnıversıteti arasyndaǵy yntymaqtastyq Qazaqstan stýdentteri úshin jańa perspektıvalar ashyp, olardyń bilim alý tájirıbesin baıytady ári elimizdegi jasandy ıntellekt pen ınjenerııa salasyndaǵy ınnovasııalar úshin qosymsha múmkindikter beredi», dedi S.Nurbek.
