Jarysqa qatysýshylarǵa sáttilik tilegen Máýlen Áshimbaev qazirgi tańda bochcha elimiz boıynsha azamattarǵa qoljetimdi sport túrine aınalyp kele jatqanyn atap ótti. Sportshylardyń da kásibı deńgeıi artyp keledi. Buǵan Qazaqstan bochcha federasııasynyń resmı túrde Halyqaralyq bochcha federasııasynyń múshesi bolyp tirkelýi jáne el chempıonatynyń ótkizilýi aıqyn dálel. Sondaı-aq Qazaqstan quramasynyń Azııa paralımpıada oıyndaryna qatysyp, jalpykomandalyq esepte segizinshi oryn alǵanyn da atap ótken jón. Palata spıkeri bul jetistikter sportshylardyń erik-jigeriniń jáne elimizde júrgizilip jatqan ınklıýzıvti saıasattyń nátıjesi ekenin aıtty. Osyǵan baılanysty Memleket basshysynyń tapsyrmasy boıynsha elimizde erekshe qajettilikteri bar azamattardy qoldaý jáne olarǵa qolaıly jaǵdaı jasaý baǵytynda aýqymdy jumys atqarylyp keledi.
«Prezıdentimiz Qasym-Jomart Toqaev barlyq salada ınklıýzıvtilik qaǵıdatyn iske asyrýǵa basa mán berip keledi. Osy oraıda Memleket basshysynyń tapsyrmasyna sáıkes ınklıýzıvti sport túrlerin damytý úshin tıisti jaǵdaı jasalyp keledi. Bul rette bochcha sııaqty sport túrlerine de úlken qoldaý kórsetilip otyr. Búginde Astanada jáne iri qalalarda ǵana emes, elimizdiń ózge de óńirlerinde bochchaǵa degen qyzyǵýshylyq artyp kele jatyr. Sondyqtan aldaǵy ýaqytta oblystarda jańa federasııalar ashylady dep senemiz. Osyndaı naqty qadamdar bochchashylarymyzdy Paralımpıada oıyndarynyń jeńis tuǵyryna jeteleıtini anyq», dedi M.Áshimbaev.
Federasııa Prezıdentiniń aıtýynsha, qazirgi tańda Pavlodar, Qaraǵandy, Mańǵystaý, Atyraý, Qostanaı, Abaı, Jetisý oblystarynda bochchadan óńirlik federasııalar ashý jumystary júrgizilip jatyr.
Bochchadan Qazaqstan Kýbogi jolyndaǵy jarysty Týrızm jáne sport mınıstrliginiń qoldaýymen Qazaqstan bochcha federasııasy uıymdastyrdy. Sondaı-aq saıysqa Astana qalasy Dene shynyqtyrý jáne sport basqarmasy, «Samuryq-Qazyna» AQ jáne «Sport Qory» týrızm jáne sport ındýstrııasyn qoldaý qory qolushyn berdi.
Bochchadan el Kýbogi sarapqa salynǵan jarystyń jabylý rásiminde Máýlen Áshimbaev jeńimpazdardy marapattap, jyly lebizin bildirdi. Quttyqtaý sózinde Máýlen Áshimbaev saıystyń joǵary deńgeıde ótkenin jáne erekshe sportshylardyń sheberligi men tabandylyǵyn aıryqsha atap ótti. Sondaı-aq ol Qazaqstan bochcha federasııasynyń qyzmetin qorytyndylap, aldaǵy jumys josparyna toqtaldy.
«Aldymyzda aýqymdy mindetter tur. Kelesi jyly birqatar is-shara uıymdastyrýdy josparlap otyrmyz. Alǵash ret bochchadan ulttyq jasóspirimder quramasyn jasaqtaımyz. Federasııa Týrızm jáne sport mınıstrliginiń jáne demeýshilerdiń qoldaýymen kelesi jyly el chempıonaty, respýblıka Kýbogi, Sultanbek Orynbasarovty eske alýǵa arnalǵan ashyq týrnır sııaqty kem degende úsh iri respýblıkalyq jarys uıymdastyrýdy kózdep otyr. Odan bólek, ulttyq quramamyz birqatar halyqaralyq dodaǵa qatysady», degen Máýlen Áshimbaev jarysqa qatysýshylarǵa, olarǵa qoldaý kórsetip, belsendilik tanytqan jattyqtyrýshylar men ata-analarǵa alǵys bildirdi.
Aıta keteıik, bochchadan Qazaqstan Respýblıkasynyń Kýbogi úshin jarys 8-9 jeltoqsan kúnderi elordada Jaqsylyq Úshkempirov atyndaǵy jekpe-jek saraıynda ótti.
