«Men jýyrdaǵy Joldaýymda 2029 jylǵa qaraı ulttyq ekonomıka kólemin eki ese, ıaǵnı 450 mıllıard dollarǵa deıin ulǵaıtý jóninde mańyzdy mindet júktedim. Bul mindet – bos qııal emes, Úkimettiń muqııat eseptegen is-qımyl jospary. Ony oryndaý úshin jańa ınvestısııalyq sıkldi iske qosý qajet. Ol el ekonomıkasynyń mańyzdy elementine aınalady.
О́tken aptada men Investısııa tartý jumystarynyń tıimdiligin arttyrý týraly Jarlyqqa qol qoıdym. Endi Investısııalyq shtabtyń jumysy jobalardy ýaqytyly jáne kedergisiz júzege asyrýǵa baǵyttalady. Shtabqa zańdy kúshi bar, ýaqytsha normatıvtik quqyqtyq aktilerdi ázirleý quqyǵy berildi. Oǵan sheshimder qabyldaýǵa quzyret berý asa mańyzdy. Ony memlekettik organdar men ulttyq kompanııalar mindetti túrde oryndaýy kerek. Mundaı sharalar elimizdegi ınvestısııalyq klımatty jaqsartýǵa yqpal etýdi kózdeıdi. Bul jumys Investısııalyq shtabtyń barlyq múshesine jeke-jeke jaýapkershilik júkteıdi», dedi Memleket basshysy.
Budan soń ol óńdeý sektoryna qarjy salatyn ınvestorlar kelesi jyldan bastap úsh jylǵa salyqtan bosatylatynyn eske saldy.
«Jalpy, ınvestısııa tartý isinde «bıýrokratııaǵa múlde jol joq – barynsha naqty is-áreket» qaǵıdaty basshylyqqa alynýy qajet. Qolǵa alynǵan istiń nátıjesi memlekettik apparattyń jiti nazarynda bolýǵa tıis. О́zderińizge málim, meniń tapsyrmama sáıkes, óńdeý sektoryna qarjy salatyn ınvestorlar kelesi jyldan bastap úsh jylǵa salyqtan bosatylady. Buryn-sońdy mundaı júıeli sharalar bolmaǵan ári onyń sheshýshi sıpaty bar. Áıtpese, ınvestısııa úshin óte joǵary halyqaralyq básekelestik qalyptasyp turǵan jaǵdaıda kózdegen maqsatqa qol jetkizý qıynǵa soǵady», dedi Prezıdent.
