Eldiń bas qarjygeri memleketke túsken tabys 12,6 trln teńgeni qurap, bastapqy jospar 94,4%-ke oryndaldy dep baıandady.
Jyldyq jospardyń jetkilikti shegine jetpeýine myna salalardaǵy salyqtyń ýaqytyly tólenbeýi sebep bolypty.
«Atap aıtqanda, korporatıvtik tabys salyǵy, ımportqa salynatyn qosylǵan qun salyǵy, paıdaly qazbalardy óndirýge salynatyn salyq jáne shıki munaıǵa eksporttyq keden bajy esebinen qalyptasty. Korporatıvtik tabys salyǵy boıynsha jospardyń oryndalmaýy 272 iri salyq tóleýshi boıynsha málimdelgen avanstyq tólemder somasynyń 24%-ke azaıýymen baılanysty. Paıdaly qazbalardy óndirýge salynatyn salyq boıynsha jospardyń oryndalmaýyna negizgi eksporttyq taýarlar baǵasynyń ortasha eseppen 12%-ke tómendeýi áser etti. Al, shıki munaıǵa eksporttyq keden bajy boıynsha jospardyń negizgi oryndalmaýy eksporttyq keden bajynyń naqty qalyptasqan mólsherlemesiniń boljamdy kórsetkishten 8%-ke tómendeýimen baılanysty boldy», dedi mınıstr.
Qarjy mınıstriniń málimetinshe, ımportqa salynatyn qosylǵan qun salyǵy boıynsha jospardyń oryndalmaýyna taýarlardyń jekelegen toptary boıynsha ımport kóleminiń tómendeýi men Eýrazııalyq ekonomıkalyq odaq elderinen ımport kóleminiń 9%-ǵa azaıýy keri kórsetkish retinde tirkelip otyr.
Al jergilikti bıýdjetter salyqtyq jospardy asyra oryndaǵan.
«Jergilikti bıýdjetterdiń kiristeri 109,2%-ke atqaryldy jáne 5,7 trln teńgeni qurady. Jospar 478 mlrd teńgege, onyń ishinde salyqtar boıynsha 425 mlrd teńgege asyra oryndaldy. Almaty oblysynan basqa barlyq óńirde kirister boıynsha josparlar asyra oryndaldy», dep esep berdi Erulan Jamaýbaev.
