Bıyl «Qazaqstannyń úzdik taýary» óńirlik kórme-baıqaýlarǵa respýblıka boıynsha 1,3 myńnan asa kásiporyn qatysty. Sonyń ishinde 27 fınalıst onlaın-daýys berý kezeńine ótti. Sońǵy kezeńde jeńiske jetken 9 dıplomant «Qazaqstannyń úzdik taýary» kórme-baıqaýynyń dıplomdary jáne emblemasymen marapattalady.
Osy jyly «О́ndiristik maqsattaǵy úzdik taýarlar» nomınasııasynda Qostanaı qalasynyń «Bolshevıchka» JShS, Abaı oblysynyń «ÝK IýNIS» JShS, Jetisý oblysynyń «Almatınskıe kraskı» JShS jeńimpaz atandy. Dıplomanttarǵa júldeni О́nerkásip jáne qurylys mınıstri Qanat Sharlapaev tabys etti.
«Bolshevıchka» JShS bas dırektory Arsen Jetpisbaev kásiporyn sapa salasyndaǵy baıqaýǵa birneshe ret qatysqanyn, al júldeni bıyl alyp jatqanyn aıtty.
«О́tken jyldarda qatysqan ár baıqaýdan keıin kemshin tustarymyzdy saralap, qorytyndy jasadyq. Kórsetkishterdi jaqsartyp, úzdik bolýǵa talpyndyq. Búgin, mine, jeńiske jettik. Bul jeńis biz úshin úlken jetistik, ujymnyń qajyrly eńbeginiń jemisi. Búgingi marapat bizdi jańa belesterge jetelep, jańa jobalardy qolǵa alýǵa shabyt berdi. Aldaǵy ýaqytta órshil maqsattar men mindetterge qanattandyrdy», dedi Arsen Jetpisbaev.
«Halyqqa arnalǵan úzdik taýarlar» nomınasııasynda Jambyl oblysynyń «TarazKojObýv» JShS, Aqtóbe oblysynyń «TK Farm Aqtóbe» JShS, Qaraǵandy oblysynyń «A.V.Group» JShS úzdik atandy.
«Bizdiń kásiporynnyń tájirıbesi mol ári álemdik naryqta da básekelese alady. О́ndiristegi qýaty da jetkilikti. Zaýyttyń biregeıligi aıaq kıim jasaýǵa qajetti bylǵaryny ózi óndire alady. 2024 jyldan bastap teri-bylǵary zaýytyn tolyq qýatta iske qosýdy josparlap otyrmyz. Sapa jaǵyn da jetildirip kelemiz. Bizdiń aıaq kıimniń sapasy joǵary, árdaıym suranysta bolǵanyn qalaımyz», dedi jeńimpaz, «TarazKojObýv» JShS bas dırektory Erkin Ábdibaev.
«Úzdik azyq-túlik taýarlary» nomınasııasynda Jambyl oblysynan «Áýlıe-ata Fenıks» JShS, Batys Qazaqstannan «Balzııa» JShS, Mańǵystaýdan «Janaózen sút zaýyty» JShS jeńimpaz boldy.
«Áýlıe-ata Fenıks» JShS quryltaıshysy Farıda Júnisovanyń aıtýynsha, «Úzdik azyq-túlik taýarlary» nomınasııasyndaǵy jeńis kásiporyn úshin úlken jetistik. Kompanııa ujymy óz óniminiń halyq arasynda suranysta bolǵanyn maqtan tutady.
Eske salsaq, «Qazaqstannyń úzdik taýary» respýblıkalyq kórme-baıqaýy jyl saıyn ótetin shara. Baıqaýdyń basty maqsaty – jeke jáne zańdy tulǵalardyń otandyq óniminiń sapasyn arttyrýǵa baǵyttalǵan qyzmetin jandandyrý, Qazaqstan naryǵyn joǵary sapaly jáne básekege qabiletti ónimmen tolyqtyrýǵa járdemdesý. Sondaı-aq otandyq jáne halyqaralyq standarttar negizinde sapany basqarý men qamtamasyz etýdiń qazirgi zamanǵy ádisterin keńinen engizýge alǵysharttar jasaý jáne oǵan járdemdesý, halyq arasynda sapa ıdeıasyn keńinen tanytý.
