Foto: primeminister.kz
Kezdesý barysynda Premer-mınıstr Ispanııa Qazaqstannyń Eýropalyq odaqtaǵy negizgi saýda-ekonomıkalyq áriptesteriniń biri ekenin, eki el arasyndaǵy taýar aınalymy ótken jyly 42%-ǵa óskenin aıtty.
Investısııalyq yntymaqtastyqty arttyrý maqsatynda 2005 jyldan beri Ispanııanyń kompanııalary Qazaqstanǵa shamamen 300 mln AQSh dollary kóleminde ınvestısııa quıdy. Elimizde jetekshi ıspanııalyq brendter, olardyń ishinde Maxam, Inditex, Pronovias jáne basqalarynyń ónimderi satylady.
«Biz Tecnicas Reunidas kompanııasynyń Aqtaýdaǵy jańa ammıak-karbamıd kesheniniń jobalyq qujattamasyn ázirleý, sondaı-aq Atyraý oblysynda polıetılen óndirý aıasynda «QazAzot» jáne «QazMunaıGazben» yntymaqtastyǵyn qoldaımyz. Quny joǵary osyndaı jobalardy tabysty iske asyrý mańyzdy. О́z tarapynan Úkimet ekonomıkanyń basym salalarynda ınvestısııalyq jobalardy iske asyrý úshin qajetti qoldaý kórsetýge daıyn», dedi Á.Smaıylov.
Úkimet basshysy ammıak-karbamıd kesheniniń qurylysy Qazaqstan úshin jańa ónim – karbamıd óndirisin jolǵa qoıýǵa múmkindik beretinin, bul – kez kelgen topyraqqa jaraıtyn quramynda azot bar biregeı tyńaıtqysh ekenin jetkizdi. Atyraý oblysynda polıetılen óndirisin jolǵa qoıý da ekonomıkany ártaraptandyrýǵa serpin beretinin aıtty.
«Biz atalǵan eki mańyzdy joba boıynsha jumysty birneshe aı buryn bastadyq. Eń ońtaıly sheshimderdi izdep taýyp, jergilikti kompanııalarmen seriktestikte tıimdi qurylys jumystaryn júrgizetinimizge sendire alamyn. Jobalardy sátti iske asyrý úshin qoldan kelgenniń bárin jasaımyz», dedi Tecnicas Reunidas kompanııasynyń atqarýshy tóraǵasy Hýan Lıado.
Tecnicas Reunidas – ónerkásiptik jobalardy ázirlep, júzege asyrýǵa mamandanǵan ıspanııalyq kompanııa. Qyzmet etken jyldary kompanııa álemniń 60-tan astam elinde 1 000-nan astam ónerkásiptik kásiporynnyń qurylysyn jobalap, basqardy.
2020 jyly Tecnicas Reunidas Astanada keńsesin ashty. Bul kompanııa 2002-2004 jyldary eldegi munaı-gaz salasynda júrgizilgen ınjenerlik jumystarǵa tartylǵan bolatyn.
