Foto: Jambyl oblysy ákimdigi
«Aýa raıynyń kúrt nasharlaýyna baılanysty 12 jeltoqsannan bastap respýblıkalyq mańyzy bar «Batys Eýropa-Batys Qytaı» avtobanynyń «Taraz-Almaty» baǵyty boıynsha jáne oblystyq mańyzy bar birqatar jolda kólik qozǵalysy toqtatyldy», delingen ákimdik habarlamasynda.
Jambyl oblysy ákiminiń tapsyrmasymen 13 jeltoqsannan bastap óńirlik jedel shtab qurylǵan. Qutqarý jumystaryna 117 arnaıy tehnıka, 103 adam (TJD, áskerı qyzmetshiler) jumyldyrylypty.
14 jeltoqsan kúni saǵat 23.00-degi jaǵdaı boıynsha qutqarý bólimsheleri 1279 adamdy qutqaryp, evakýasııalady. Olar Qordaı aýdanyndaǵy 6 jylytý pýnktine ornalastyryldy (Qaınar-1, Alǵa-1,Qordaı-3, Kenen-1). Áli de qar qursaýynda qalǵan kólikterdiń sany naqtylanyp jatyr.
Qatty jel men qardyń saldarynan Shý aýdanynda elektr jelileri úzilip, tirekter qulady. Tótenshe jaǵdaı saldarynan «Shý Otar» ýchaskesinde 11 jolaýshylar poıyzy toqtap tur, olardyń árqaısysynda ortasha eseppen 500-700 adamnan bar. 12 júk poıyzy óz ýaqytynan keshigip jatyr.
Oblystyń 4 aýdanynyń 32 eldi mekeninde 8 882 abonent elektr qýatynan ajyratylǵan. Qazirgi kezde jeldiń jyldamdyǵy sekýndyna 45 metrge deıin jetip tur. Aldaǵy kúnderi «Qazgıdromet» RMK boljamyna sáıkes 30 m/s qatty jel uıytqýy saqtalady.
15 jeltoqsan saǵat 06:00 - degi jaǵdaı boıynsha 2413 adam qutqaryldy, olardyń ishinde 90 bala bar. 600-ge jýyq adam úılerine qaıtaryldy. 1813 adam alty aýyldaǵy jylytý pýnktterine jetkizildi. 3 azamat Qordaı aýdandyq ortalyq aýrýhanasyna jetkizildi. Olardyń jaǵdaılary turaqty, dárigerdiń baqylaýynda. Eki kún ishinde jalpy 5000 adam qutqaryldy.
Qazirgi ýaqytta Qordaı jáne Shý aýdandarynda qosymsha 825 oryndyq 9 jylytý pýnkti uıymdastyrylǵan. Qutqarý sharalaryna 171 adam jáne 76 birlik tehnıka jumyldyrylǵan. Joldaǵy blok-beketterge polısııa narıadtary qoıylǵan.
Jambyl oblysy ákimdigi turǵyndardy tek resmı aqparattarǵa súıenýge, sabyr saqtaýǵa shaqyrdy. Qalyptasqan jaǵdaıǵa baılanysty oblys boıynsha qaýyrt jeli nómirleri iske qosyldy: 8 7262 513575, 51 41 67.
