«City» emhanasynyń jańa fılıaly Astananyń qarqyndy damyp kele jatqan aýdanynda ornalasqan. Bul nysanda 30 myńǵa deıin pasıent tirkele alady. Sondaı-aq munda halyqqa alǵashqy dárigerlik kómekten bastap keshendi dıagnostıka men konsýltasııaǵa deıingi qyzmetter kórsetiledi.
Jobanyń ınvestory, «Olymp Medical Group» JShS bas dırektory Erlan Súleımenovtiń aıtýynsha, bul City emhanalar jelisiniń úshinshi fılıaly. Elordanyń Nura jáne Almaty aýdandarynda eki fılıal jumys istep jatyr. Taǵy da úsh nysan kelesi jyly paıdalanýǵa berilmek.
Emhananyń taǵy bir ereksheligi onda mammologııalyq ortalyq ashylady. Naýqastar munda keshendi dıagnostıkadan ótip, sút bezi aýrýlarynan emdele alady. Medısınalyq ortalyqta tomosıntezi bar sıfrlyq mammografııa, dástúrli jáne vakýýmdyq aspırasııalyq bıopsııa ádisteri, hırýrgke qaterli isikterdi alyp tastaý jolyn kórsetetin lokalızasııalyq ıneler ornatý sııaqty dıagnostıkalyq tehnologııalar qoldanylady.
Sonymen qatar emhanada barlyq qajetti quraldarmen jabdyqtalǵan ambýlatorııalyq hırýrgııa ortalyǵy ashylmaq.
Astana qalalyq Qoǵamdyq densaýlyq saqtaý basqarmasynyń basshysy Álııa Rústemovanyń aıtýynsha, qazirgi ýaqytta elordanyń sol jaǵalaýynda ambýlatorııalyq kómek berý isi kenjelep qalǵan. Qosymsha taǵy 5 emhana ashý kerek. Halyq sanynyń udaıy ósip kele jatqanyn eskersek, medısınalyq mekemelerge degen qajettilik áli de arta beredi. Bul máseleni sheshýde memlekettik-jekemenshik seriktestik belsendi qoldanylady. Bes jyl ishinde Astana qalasynyń ákimdigi 3 memlekettik emhana salynady jáne 12 jeke emhana ashylady dep josparlap otyr.
