Bıyl Halyqaralyq Almaty áýejaıy úshin jolaýshylar aǵynynyń rekordtyq kórsetkishi tirkelip otyr. Búgingi esep boıynsha bıyldyqqa 9 mıllıon azamat áýejaı qyzmetin paıdalanǵan. Marattyń enshisine dáp sol 9 mıllıonynshy sátti bılet buıyrypty. Múlde oılamaǵan jerden oljaǵa kenelgen jolaýshyny áýejaı basshylyǵy qýanyshpen qarsy alyp, eki kisige arnalǵan demalys sertıfıkatyn tabystady. Osylaısha, sátti bılet ıesi jaqyn jandarynyń birimen Bodrýmǵa saıahatqa attanbaq.
«Bul – áýejaı úshin de, Almaty qalasy úshin de tarıhı oqıǵa. Nege deseńiz, Almaty áýejaıynyń búkil tarıhynda alǵash ret jolaýshylar aǵyny 9 mln adamǵa jetip otyr. Sátti bılet ıesine syılaǵan joldamada barlyǵy qamtylǵan. Osy rette bizben jumys isteıtin barlyq áýe kompanııasyna alǵys bildiremin. Biz ol kisiler bolmasa, osyndaı nátıjege qol jetkizbes edik. Bolashaqta jańa jolaýshylar termınaly ashylsa, 10 mıllıonynshy jolaýshyny qabyldarymyz sózsiz. Osy oraıda Kólik jáne kommýnıkasııa mınıstrligine alǵys bildiremin», deıdi Halyqaralyq Almaty áýejaıynyń prezıdenti Alyp Er Týnga Ersoı.
Kútpegen qýanyshqa kenelgen Marat Nuralın áýejaıda ózine mundaı syı-qurmet kórsetilgenine dán rıza. Qýanyshyn jasyra almaǵan jolaýshy óz áserimen bólisti.
«Men ózim Astana qalasynyń turǵynymyn, Almatyǵa qudamyzdyń mereıtoıyna keldik. Bizge ushaqta kishkene kúte turyńyzdar degende ýaıymdap qaldyq. Kireberiste quttyqtap jatqanda ne boldy eken degen qorqynysh boldy. Osyndaı syıǵa ıe bolǵanyma qýanyshtymyn. О́zim ushaqpen jıi ushamyn. Aldyńǵy aptada ǵana Almatyǵa kelgen edim. Túrik eline múlde jolymyz túspegen eken, tosyn joldama sonyń sátin týdyrar. Ásirese zaıybymnyń qýanyshynda shek joq», deıdi M. Nuralın.
Aıtpaqshy, elimizdiń áýe qaqpasy sanalatyn Almaty aılaǵynyń ótkizý qabiletin arttyrý maqsatynda jańa Halyqaralyq jolaýshylar termınalynyń qurylysy júrip jatyr. Keshen keler jyldyń jaz aıynda aıaqtalmaq. Sý jańa ǵımarat bort kólemine baılanysty bir ýaqytta jeti ushaqqa deıin qabyldaýǵa qaýqarly. Al áýejaıdyń jalpy ótkizý qabileti jylyna 14 mln jolaýshyǵa deıin artpaq. Jobaǵa sáıkes qurylym qoldanystaǵy termınal ǵımaratyna jerústi ótkeli arqyly qosylady. Jańa úlgi jolaýshylarǵa ǵımarattyń syrtyna shyqpaı-aq ishki jáne halyqaralyq reısterden aýysýǵa ońaı qol jetkizýdi qamtamasyz etpek. Osylaısha, jańa termınal tek halyqaralyq reısterge, al qoldanystaǵy termınal ishki reısterge qyzmet kórsetedi.
ALMATY
