Eki aptaǵa jýyq ýaqyt buryn tosyn minez tanytqan tabıǵat jambyldyqtardy bir synap aldy. Eki aýdanda tótenshe jaǵdaı jarııalanyp, onnan astam jolaýshylar poıyzy Shý beketinde aıaldaýǵa májbúr boldy. Jalpy, eki aýdandaǵy burqasyn boran kezinde bes myńǵa jýyq adam qutqarylyp, olarǵa jergilikti bılik, aýyl halqy, kásipkerler qoldan kelgen kómekti aıaǵan joq.
Birqatar baǵyttaǵy jol jabylǵan ýaqytta jolaýshylardyń eńsesi tústi, qamyqty, jabyqty. Biraq bul kúni tótenshe jaǵdaılar jónindegi departament ókilderi, polısııa qyzmetkerleri jumylǵan judyryqtaı iske kiristi. Jolda qalǵan jolaýshylardy jyly ǵımarattarǵa ornalastyrý, olardy ystyq tamaqpen qamtý jumystaryna jergilikti bılikpen qatar aýyl azamattary, kásipkerler de judyryqtaı jumyldy.
Jolaýshylar poıyzy arqyly myńnan astam azamat borandy beket sanalǵan Shý stansasy mańynda aıaldady. Bet qarıtyn úskirik aıaz ben jeldiń yzǵary olardy ábden qaljyratqan. Túksıgen qabaqtardan ishtegi ókinishtiń taby ańǵarylatyndaı.
Janaryn muń shalǵan otandastarymyzdyń janyna demeý bolýǵa tyrysqan jergilikti azamattar osy kúni kúre joldyń boıyna da, temirjol beketine de asyqty. Biriniń qolynda samaýryn, endi biriniń qolynda ystyq tamaq salynǵan sómkeler. Jolda qalǵan jurtty qoldaýǵa asyqqan azamattardyń nıetine jan súısinedi. Aýdan, aýyl ákimderi de shapqylap júr. О́z erkimen iske kiriskender de bar. Báriniń nıeti de, peıili de taza, adal. Judyryqtaı jumylǵan jurttyń kózinen janashyrlyq baıqalady. Jany jabyqqan aǵaıynǵa qolyndaǵy jyly-jumsaǵyn úlestirip júr. Boıy jylynǵan jurtqa da til bitti. Alǵysyn jaýdyryp jatyr.
Jolda qalǵan jolaýshylarǵa jyly-jumsaǵyn aparyp, ystyq tamaqpen qamtamasyz etken kásipkerlerdiń birin sózge tartyp kórgenbiz. Sabazyń basyn ala qashty. Nege? Túsindirdi.
«Mundaı jaǵdaıda birlik kerek. Jolǵa shyqqan aǵaıyn elsiz jerde qalmady. Jaratqan ondaı qasiretten saqtasyn. Bastysy, bári de eldiń ortasyna jaqyn mańda júr. Qazaq qashanda qolda baryn aıamaıtyn halyq qoı. Tarıhqa zer salsaq, ár elden aýyp kelgen aǵaıynǵa da meıirimin tókti emes pe? Qolyndaǵy nanyn bólip jedi. Onysyn mindetsingen joq. Ol ýaqytta jaǵdaı basqasha edi. Qazir múlde basqa kezeń.
Tótenshe jaǵdaı kezinde barymyzdy tyǵyp qannen qapersiz jatsaq, adamdyǵymyzǵa, azamattyǵymyzǵa syn ǵoı. Bir dúnıe anyq. Qolymyzda tıtteı de bolsa qarjy bar bolsa, ol bizge Jaratqannyń ámirimen buıyrdy. Sondyqtan bul jaqsylyqty Jaratqan jasap otyr dep túsingen abzal. Qaıyrymdylyq Qudaıdan. Biz sebepshimiz. Onymen maqtanýǵa bolmaıdy», dedi ol.
Mundaı sózdi aıtqandar az bolǵan joq. Janarynan meıirim nury sebezgilegen aýyldardaǵy aǵaıynnyń jolda qalǵan jolaýshylarǵa kórsetken qamqorlyǵy bizdiń de janymyzdy tebirentti. Jasaǵan jaqsylyǵyn jarnamalaýdan bas tartqan jurttyń kirshiksiz taza kóńili qýantty.
«Mundaı boran bolady dep eshkim kútken joq. Qazaq qaı kezde de qamqorlyq jasaýdan aldyna jan salmaıtyn halyq qoı. Bul synaqta da birligimizdiń bekem ekenin kórsettik. Qytymyr aıazda kez kelgenimiz jolda qalýymyz múmkin. Qıyndyqqa tap bolǵan jolaýshylarǵa qoldan kelgen kómegin aıamaǵan azamattarǵa tek alǵys aıtamyz», deıdi Eski Shý aýyldyq okrýginiń ákimi Nurlan Abashov.
Kúre joldyń boıynda kólikterin qańtaryp qoıǵan jolaýshylar jyly-jumsaǵyn alma-kezek usynǵan jergilikti jurtpen dostasyp ta úlgergen sekildi. «Ashtyqta jegen quıqanyń dámi aýyzdan ketpes» deımiz ǵoı. Bul da týra soǵan uqsas jaǵdaı. Jol boıy. Tirshiliktiń ısi sezilmeıdi. Mundaıda jasalǵan jaqsylyq kimniń jadynan óshsin?
«Tolassyz jaýǵan qar men uıytqyp soqqan jel bizdi ábigerge túsirdi.Baǵytymyz beımálim. Qaıda turǵanymyz da túsiniksiz. Ne ınternet, ne basqa joq. Qandaı amal qylarymyzdy bilmeı turǵanda barlyq qurylymnyń qyzmetkerleri qoldan kelgen kómegin aıamady. Aýyldaǵy jurt ta ystyq tamaǵy men qolynda baryn alyp, qolushyn berdi. Sol úshin de olarǵa rııasyz alǵysymdy aıtamyn», deıdi jolda qalǵan Iýlııa esimdi orys qyzy.
Jel ysqyrǵan sol kúnderi áleýmettik jelilerde túrli beınejazba tarady. Qazaq halqynyń alǵaýsyz peıiline alǵys bildirgenderdiń qatarynda qazaqtardan bólek, ár túrli etnos ókilderi bar. Olardyń bári de alǵysyn jaýdyryp jatty.
Iá, alǵashqy qar Shý men Qordaı halqyn ábden sastyrdy. Biraq jergilikti bılik pen jany jomart azamattardyń birlesýiniń arqasynda jambyldyqtar bul synnan da súrinbeı ótti. Azamattar jumylǵan judyryqtaı iske kirisip, bes myńǵa jýyq adamdy der kezinde qutqardy. Osylaısha, birlik bar jerde tirlik bolatynyn ańǵartty.
Jambyl oblysy
