Daryndy jastar atalymy boıynsha Qazaqstannyń qos óreni – Eva Korysheva men Danıel Tazabekov jeńimpaz dep tanyldy. Olardyń ekeýi de óz qatarlastary arasyndaǵy jarystarda tabysty óner kórsetip júr.14 jastaǵy Eva bıyl Túrkııa men Belgııada top jaryp, Tennis Europe reıtınginde 18-orynǵa taban tiredi. Juptyq saıysta ol eki ret bas júldeni oljalady. Al 16 jastaǵy Danıel atalǵan týrnırler serııasynda jeti márte baq synap, jaqsy nátıje kórsetti. Nátıjesinde, úzdikter tiziminde 20-satyǵa jaıǵasty. Sondaı-aq qandasymyz bıyl Ispanııa men Italııada ótken juptyq básekelerde aldyna jan salmady.
Jalpy, Qazaqstannyń jas tennısshileri buǵan deıin de Eýropa tennıs qaýymdastyǵynyń reıtınginde birneshe ret kósh bastaǵanyn aıta ketken abzal. Máselen, 2021 jyly Zara Dárken dara shyqsa, byltyr Zańǵar Nurlanuly teńdessiz dep tanyldy.
