sýretti túsirgen avtor
Búgin Shyǵys Qazaqstan oblysynyń ákimi Ermek Kósherbaev kestege sáıkes júrgizilip jatqan jumystardyń barysymen tanysty.
«Kópir Memleket basshysynyń tapsyrmasy boıynsha salynyp jatyr. Erteńgi kúni kópir logıstıkany, týrızmdi, shaǵyn jáne orta bıznesti damytýǵa múmkindik beredi. Qazirdiń ózinde munda jaqyn mańdaǵy aýyldardyń turǵyndary jumys istep, jańa jumys oryndary ashylyp jatyr. Kópirdiń bárimiz úshin, birinshi kezekte, shalǵaıdaǵy shekaralas aýdandarymyz; Kúrshim, Zaısan jáne Tarbaǵataı aýdandarynyń turǵyndary úshin mańyzy zor. Men bul strategııalyq mańyzdy jobany 2024 jyly aıaqtaıtynymyzǵa senimdimin», dedi Ermek Kósherbaev.
Esterińizge sala ketsek, qos jolaqty avtomobıl kópiri Kúrshim aýdanynyń Quıǵan aýylynyń tusyndaǵy eni eń kishi ýchaskesinde salynyp jatyr. Degenmen, bul Qazaqstandaǵy eń uzyn kópir bolady.
Qazirgi ýaqytta 18 tirektiń 12-si ornatylyp, alty tirekti ornatý jumystary júrgizilip jatyr. Budan basqa, kirme joldar, sý ótkizý qurylystary men aınalma joldar retke keltirilý bastalǵan.
«Eger búgingi tańda kezek kútý ýaqytyn eseptemegende, sý qoımasy arqyly parommen ótetin ýaqyt 40 mınýtqa sozylsa jáne parommen árbir júrip ótkeni úshin kóp aqsha tóleýge týra kelse, qurylys aıaqtalǵannan keıin sý qoımasyn eki mınýtta ǵana kesip ótýge bolady», dep atap ótti Shyǵys Qazaqstan oblysynyń ákimi.
Búgingi tańda nysan respýblıkalyq menshikke, ıaǵnı Avtomobıl joldary komıtetine tapsyryldy. Qurylys jumystarynyń sapasy turaqty baqylaýǵa alynǵan. Jol aktıvteri sapasynyń ulttyq ortalyǵy 14 ret kelip, 20 synama synaqtan ótkizdi. Barlyq anyqtalǵan eskertý joıyldy.
Búgin Kúrshim jáne Samar aýdandarynyń turǵyndary birinshi bolyp tehnologııalyq ótkel boıynsha bir jaǵalaýdan ekinshi jaǵalaýǵa ótti.
