Aımaqtaǵy jaýapty mamandar aqqýlardyń óleksesi týraly derekter kún sanap artyp jatqanyn málimdedi.
«2023 jylǵy 21 jeltoqsanda Qarakól kólinde aqqýlar ólgeni týraly alǵashqy habarlama kelip tústi. 6 qańtardaǵy jaǵdaı boıynsha biz 601 aqqý ólgenin anyqtadyq. Qyrylǵan aqqýlardyń 90%-ten astamy – jas tólder», dedi Mańǵystaý oblystyq orman sharýashylyǵy jáne janýarlar dúnıesi aýmaqtyq ınspeksııasynyń basshysy Ǵabbas Dosatov apparattyq keńeste.
Apparat keńesine jınalǵandar Qarakól jaǵalaýynan óleksesi tabylǵan aqqýlar Qazaqstannyń qyzyl kitabyna engizilmegenin eske saldy.
«Aldyn ala málimetterge súıensek, Qarakól kólinde aqqýlardyń jappaı qyrylýy qus tumaýynyń órshýinen bolǵanyn kórsetedi. Olardan H5N1 azııalyq shtammy tabyldy. Bul vırýstyń adamdarǵa juqpalylyǵy tómen, qustarǵa áser etedi, basqa janýarlar juqtyrǵan jaǵdaıda sımptomsyz ótedi. О́tken jyly veterınarııalyq-profılaktıkalyq is-sharalar josparyna sáıkes qaýip tóngen aımaqta alty myń bas qus vaksınasııalandy. Oblysta barlyǵy úsh qus sharýashylyǵy bar, biraq olarda sharýashylyqtyń jabyq túri bolǵandyqtan qustardy egýden bas tartty», dedi Qazaqstan Respýblıkasy Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń Mańǵystaý oblystyq aýmaqtyq ınspeksııasynyń basshysy Temirbek Nurtazın.
Al aımaq basshysy Nurlan Noǵaev qustardyń qyrylý sebebin jan-jaqty zerdeleýdi tapsyrdy.
«Ekologtar men bilikti mamandar máseleniń mán-jaıyn birge anyqtap, munyń odan ári taralýyn boldyrmaý úshin sharalar qabyldaýy kerek. Ornıtologtar qustardyń tamaqtanýy týraly naqty usynystar berýi kerek. Keıbir sarapshylar aqqýlardy tamaqtandyrý qoldasa, al basqalary, kerisinshe, qaýip dep sanaıdy. Asyǵys qorytyndy jasaýǵa bolmaıdy, aldymen anyqtaý kerek», dedi Nurlan Noǵaev.
