Maestro Alan Bóribaevtyń Shveısarııadan bastap Japonııaǵa deıingi kópqyrly shyǵarmashylyq joly, onyń zor bilimi men mol tájirıbesi bas dırıjerge túrli operalardy qoıýmen qatar belsendi mýzykalyq baǵdarlama jasaı otyryp, klassıkalyq ónerdiń jańa qyrlaryn tabýǵa múmkindik berip keledi. «Jan-jaqty Ros- sını» konserti de sol sanattan tabylyp, elordadaǵy aıtýly mádenı oqıǵaǵa aınaldy.
Jalpy, «Astana opera» teatrynda ıtalııalyq kemeńger Djoakkıno Rossınıdiń shyǵarmashylyǵy «Sevıldik shashtaraz», «Aljırdegi ıtalııalyq qyz» jáne «Jibek saty» tárizdi úsh komedııalyq opera arqyly tanystyrylǵan. Dese de konsert aıasynda kórermenderdiń keremet operalyq jáne sımfonııalyq týyndylarymen tanymal kompozıtorǵa salmaqty sýretshi retinde qaraýǵa tamasha múmkindik týdy.
«Jan-jaqty Rossını» – bul kompozısııalardyń jıyntyǵy ǵana emes, sonymen qatar klassıktiń mýzykalyq murasyna saıahat ispetti. Onda san alýan beıneler molynan kórinis tapqan. Máselen, Stabat Mater shyǵarmasynda kópshilik kúshti emosııalar týǵyzatyn tereń rýhanı reńkterdi tabady. Al «Semıramıda» operasyndaǵy arııada basty keıipkerdiń ǵashyqtyq ýaıymy shynaıy jetkizildi. Aıta keteıik, taǵdyrdyń jazýyna qaramastan, Rossını óz týyndysynda Semıramıdany názik sezimderge beıim ári armanshyl áıel retinde kórsetedi.
Qyzyqty dýetter, túrli sıpattaǵy arııalar men áserli kavatınalardan turatyn baǵdarlamanyń árbir bóligi biregeı. Kórermender aýdıtorııasy jeńil ázilden bastap, tragedııaǵa deıin Rossını beıneleriniń san alýandylyǵyn sezindi jáne árbir tyńdaýshy osy Romantızm bastaý alǵan dáýirge mýzykalyq saıahatta ózi úshin erekshe dúnıe tapqany sózsiz.
Kóńilge kóktem syılaǵan klassıkalyq mýzyka keshinde S.Ahmetova, A.Qaponova, T.Vısınskaıa, S.Muratbekova, M.Islamova, G.Aldadosova, Sh.Rasylhan, E.Saıpov, A.Gabdıev, Á.Zeınolla, A.Ábilda, L.Alamanova, S.Baqytjan syndy teatrdyń beldi ártisteri kórermenderge óz ónerlerin tartý etti.
Solıster jarqyn ári mazmundy vokaldyq óner kórsetýlerimen konserttiń sánin keltirdi.
Alan Bóribaevtyń jetekshiligindegi «Astana opera» Sımfonııalyq orkestriniń jáne teatr solısteriniń qatysýymen Kúlásh Baıseıitova atyndaǵy Kameralyq zal sahnasynda ótken konsert uly áýender men sheber oryndaýshylardyń kásibı kemeldigin pash etken naǵyz mýzykalyq merekege aınaldy.
