Sýretti túsirgen – Erlan OMAR, «EQ»
Bıylǵy maýsymda Almatylyqtar úshin alǵash esigin ashqan alyp syrǵanaý aıdyny Abaı alańynda oryn tepken. Sonymen qatar 28 panfılovshylar saıabaǵynda, Tuńǵysh Prezıdent parkinde, Ortalyq stadıon men M.Áýezov teatrynyń aldynda, Gúlder saıabaǵy men Oqýshylar úıiniń mańynda syrǵanaý oryndary tún jarymyna deıin úzdiksiz jumys istep tur. Qala turǵyndary men megapolıs qonaqtary munda qalaǵan ýaqytynda syrǵanaq teýip, sergı alady. Tipti mundaǵy arnaýly nusqaýshylar kelýshilerge tegin keńes berip, qyzmet kórsetedi. Aldaǵy kúnderi de qalanyń birneshe núktesinen osyndaı syrǵanaqtar ashylmaq.
Demalýshylar ózimen birge konkılerin ala kelýge tıis. Sondaı-aq syrǵanaq alańdarynyń mańynda tamaqtanýǵa arnalǵan arnaýly oryndar men konkılerdi jalǵa berý ortalyqtary jumys isteıdi. Uıymdastyrýshylar jalǵa berý baǵasy qoljetimdi bolýy árdaıym qadaǵalanyp otyratynyn aıtady.
Muzaıdyndary Almatynyń myń qubylǵan aýa raıyna oraılastyrylǵan. Kún raıy 10 gradýsqa deıin jylysa da, syrǵanaq erimeıdi. Iаǵnı alańdardyń arnaýly tońazytqysh quraly muzdy eritpeýge qolaıly temperatýrany qamtamasyz ete alady. Qala jurtshylyǵyna qýanysh syılaǵan áleýmettik jobany júzege asyrýǵa jergilikti ákimdik muryndyq bolǵan.
«Oıyn-saýyq ortalyqtaryndaǵy muzaıdyndaryna barǵanda biraz shyǵyndalatynbyz. Byltyrdan beri osy tegin syrǵanaq alańdaryna keletin boldym. Bul da qarapaıym turǵyndar men stýdent jastarǵa jasalǵan úlken kómek dep esepteımin», deıdi qala turǵyny Maqsat Dúısen.
Syrǵanaq alańdarynyń esigi kóktemniń alǵashqy aıyna deıin ashyq.
ALMATY
