Eskeldilikter úshin eki ákimdik ǵımaratyn salynýyna bar-joǵy eki aı ǵana ýaqyt ketken. Sebebi nysandar blokty-modýldik jabdyqpen qalanǵan. Árbiriniń quny 50 mln teńgeni quraıtyn qos nysannyń qurylysyn «Qaz Damu Construction» JShS júrgizgen. Buryn aýyldyq mádenıet úıiniń bir bóliginde otyrǵan ákimdiktegiler endi sý jańa nysanda mańyzdy sharýalarmen aınalysady. Onyń ústine jańa ǵımaratta shaǵyn konferensııa zaly da qarastyrylǵan. Munda aýyl turǵyndarymen jıyndar uıymdastyrýǵa qolaıly jaǵdaı jasalǵan. Ashylý saltanatynda sóz alǵan aýdan ákimi Eldos Ahmetov qos aýyldyń da turǵyndaryn quttyqtap, halyqtyń turmys sapasyn arttyrý baǵytyndaǵy jumystarymen bólisti. Bıyl Qaınarly aýylynda feldsherlik-akýsherlik pýnkt salynatynyn aıtyp qýantty.
Sol kúni Syrymbet aýylynda sporttyq nysannyń da lentasy qıyldy. Jergilikti mesenat aýylda qańyrap bos turǵan eski ambýlatorııa ǵımaratyn qaıta jańǵyrtyp, aýyl balalaryn sportqa beıimdeıtin nysanǵa aınaldyrypty. Ishine zamanaýı jabdyqtardy ornalastyrǵan qaıyrymdy azamat óz qaltasynan 25 mln teńge qarjy jumsaǵan. Kúrdeli jóndeýden ótken ǵımarat ishine jýynatyn jerdi de ornalastyrǵan. Aýdan ákimi kásipkerdiń arqasynda aýyldan álemdik arenalarda top jaratyn boks maıtalmandary shyǵatynyna sendirdi. Sebebi mesenat aldaǵy ýaqytta osy sporttyq nysanda shynyqqan sportshylardyń alys-jaqyn jerde ótetin dodalarǵa barý-kelý shyǵynyn óz moınyna alyp otyr. Sonymen qatar jergilikti ákimdik mamandarynyń sózinshe, kásipker keler jyly nysan syrtyndaǵy bos jatqan orynǵa fýtbol jáne voleıbol alańdaryn salyp bermek. Osylaısha, aýyldaǵy 350 balanyń ýaqyty bos ótpeı, sportpen shuǵyldanýyna jaǵdaı jasaldy.
Bul rette Jalǵyzaǵash aýylynyń turǵyndary da syısyz qalmady. Aýylda sý jańa veterınarııa pýnkti paıdalanýǵa berildi. 15 jyldan beri basqa ǵımarattan jalǵa alyp kelgen aýyldyń mal dárigerleri endi zamanaýı ǵımaratta ýaqyt talabyna saı qondyrǵylarmen jumys istemek. Sebebi olardyń jedel ári tıimdi jumys isteýi úshin 11 kompıýter, 11 planshet, tórt túlikke salynǵan chıpti skanerleıtin qondyrǵy jáne jańa kólik berildi. Onyń ústine ǵımaratta dári-dármek saqtaıtyn qoıma da qarastyrylǵan. Qurylys jumystaryna aýdandyq bıýdjetten 11 mln teńge bólingen. Ony da «Qaz Damu Construction» seriktestigi júrgizgen. Aıtpaqshy, aýdandaǵy mal dárigerlerine bıyl bólingen eki kóliktiń biri Aldabergenov aýylyndaǵy veterınarııa pýnktine berilipti.
Aqsý aýdanyna qosylyp, burynǵy keskin-kelbetinen aıyryla bastaǵan Qapal aýyly búginde qaıta jańǵyryp jatyr. Sonyń aıǵaǵyndaı Qapal aýyldyq okrýginde jańa ákimdik ǵımaraty paıdalanýǵa berildi. Ǵımarattyń ashylý saltanatyna aýdan ákimi Berik Tynyshbaev, aýyl aqsaqaldary, aýyl turǵyndary qatysty.
«Aýyl kórkine sán qosqan jańa ákimdik ǵımaraty eldi mekenniń bolashaǵyn baıandy, keleshegin kemel etýge septigin tıgizetinine senemin. Aýyz sý júıelerine jóndeý jumystary júrgizildi. Aldaǵy ýaqytta da áleýmettik máselelerdi sheshý arqyly turǵyndardyń ómir súrý sapasyn jaqsartýǵa baǵyttalǵan ıgi jumystar jalǵasyn tabady degen oıdamyn», dedi aýyldyq qoǵamdyq keńes tóraǵasy Sábıt Ábikenuly.
Sapaly ákimdik ǵımaratynda májilis zaly, mamandarǵa arnalǵan 6 jumys bólmesi bar. Bul nysan aldaǵy ýaqytta halyq ıgiligi úshin qyzmet kórsetedi. Jıyn sońynda aýyl qarııalary eldi mekendi eńselendirýge úles qosyp, elge qyzmet etip júrgen azamattarǵa aq batasyn berdi.
Kópke málim «Halyq únine qulaq asatyn memleket» tujyrymdamasyn iske asyrý maqsatynda Memleket basshysynyń tapsyrmasy aıasynda bıylǵy jazdyń ortasynan bastap Astana qalasynda Prezıdent Ákimshiliginiń, Úkimet apparatynyń jáne ortalyq memlekettik organdardyń biryńǵaı frontofısi retinde Úkimet apparatynyń janynan azamattardy qabyldaý ortalyǵy jumys istep keledi. Osy rette oblys ortalyǵynda Jetisý oblysy ákimdiginiń janynan qurylǵan Azamattardy qabyldaý ortalyǵy ashylyp, halyqty bir qýantty. Ortalyq turǵyndarǵa elektrondy-sıfrlyq qoltańbamen túrli anyqtamalar bere alady. О́tinishterdi qabyldaýdy biryńǵaı júıeli konsýltasııalaýǵa, jeke qabyldaýlar men tirkeý júrgizýge mamandanǵan. Iаǵnı ortalyq bazada azamattar kez kelgen ýaqytta memlekettik organǵa ótinish bere alady. Sondaı-aq atqarýshy bılik ókilderi ótinishi kelip túsken azamattarmen kezdesý ótkizedi.
Osy oraıda oblystyq densaýlyq saqtaý, bilim berý, áleýmettik qorǵaý, jer qatynasy, aýyl sharýashylyǵy jáne turǵyn úı-kommýnaldyq sharýashylyq basqarmalary, Taldyqorǵan qalasy ákimdiginiń turǵyn úı qatynasy sııaqty memlekettik organdardan 19 qyzmetker arnaıy ortalyqqa jiberildi. Sonymen qatar aldaǵy ýaqytta ortalyqta jergilikti atqarýshy jáne aýmaqtyq memlekettik organdardyń basshylary azamattardy qabyldaý sharasyn ótkizý josparlanyp otyr. Bul rette óńirdegi 32 basshynyń qabyldaý kestesi tolyǵymen bekitildi.
Jetisý oblysy
