Bertinge deıin Úkimettiń kómegine júginbeı, taza mańdaı terimen Qońyrtaýdyń órisin tórt túlikke toltyrǵan. Memlekettiń malǵa beretin sýbsıdııasyn keıinnen ǵana alǵan fermer endi sharýashylyǵyna jańa tehnıka alýdy josparlap otyr.
«Sýbsıdııany keıinnen ǵana alyp júrmin. Dızel otynymyzdy, jem-shóbimizdi aqtap tur. Endi «KamAZ», traktor alsam degen oıym bar. Tehnıka degen sharýashylyqtyń kúshi ǵoı. Osy ýaqytqa deıin eski tehnıkanyń arqasynda aman-esen shóbimizdi túsirip otyrdyq qoı. Jańalap alsaq, jaqsy bolar edi», deıdi fermer.
Sharýashylyq ıesi jaqynda taǵy bir qystaq alyp, malynyń denin sonda ustap otyr. Qazirgi qonysynan 4 shaqyrym jerde. О́ıtkeni óz qystaǵynan 4-5 jerden qudyq qazǵan eken, sý shyqpapty. Tereń jerinen shyqqanymen kópke barmaı kózi taýsylady. Al mal sýǵa semiredi.
Azamattyń negizgi kómekshisi – Qanaǵat baýyry. Aǵaıyndy ekeýi ekeýlep, eńbek etip júr. Onymen qosa Beǵazy aýylyndaǵy 4 adamdy jumyspen qamtyp otyr. Sıyryn otbasyly jandarǵa senip tapsyrǵan. Olar – jańa qystaǵynda. Shóp naýqany kezinde taǵy bir jumyskerdiń kúshine júginedi. Shóp demekshi, keıingi eki-úsh jylda óz jerin shabýdy qoıǵan.
«Qurǵaqshylyq bizdiń de jerdi aınalyp ótpedi. О́zi shabyndyǵymyz shamaly edi. Múldem shóp shyqpaı qaldy desek te bolady. Áıteýir áýpirimdep júrip, Qyzylaraıdyń orman sharýashylyǵyna tıesili jerdi shaýyp alyp otyrmyz. Kelisimshart jasasyp, qarajatyn tólep. Bul da bolsa úlken kómek», deıdi sharýa ıesi.
Maıózek, Syntas atty jaıylymdyq jeri shuraıly. Maly naýryzda dalaǵa shyqqannan bastap qar túskenshe osy órisinde. Bul jaqtyń qysy qolaıly. Maly qańtardyń ortasyna deıin dalada jaıylady. Qar qalyń túse qoımaıdy. Munysy da qurǵaqshylyq búıirden qysqan ýaqytta kómek bolyp otyr.
Bul sharýashylyqta mal bordaqylaý jumysy da jolǵa qoıylǵan. Iri qara malyn jemge qoıyp, semirtip, Balqash pen Qaraǵandyǵa saýdalap otyr.
– Ákem negizi mehanızator bolǵan. Keıinnen mal baǵyp, bizge ósirip berdi. Ol kisiniń eńbegi eren. Bizdi de eńbekke erte úıretti. Biz de ákeniń ónegesin boıǵa sińirip, qal-qýatymyz jetkenshe, eńbektenip jatyrmyz. Malymyzdyń amandyǵy – janymyzdyń amandyǵy. Osydan eki-úsh jyl buryn 10-15 bas jylqymyz joǵalatyn edi. Qazir urylar aıylyn jıdy. Oǵan da táýbe, – deıdi A.Ǵazızuly.
Azamattyń esimin Arqa jurty jaqsy biledi. Azamattyǵymen, márttigimen hám ulttyq sporttyń upaıyn túgendep júrgen janashyr retinde. Bertinge deıin at ústinde júrip, serke tartysty. Báıge jaratyp, dodaǵa qosty. Tazy júgirtip, ań qýady.
Baryn basyp emes, shashyp jeıtin Azamat retinde el asa qurmetteıdi.
Jomart fermer jolynan jyǵylmaıdy. Qaıyrymdylyq jasaýǵa únemi nıetti. Ulttyq sport oıyndaryna turaqty demeýshi. Bergeni yrysyn azaıtpaıdy, berekesin arttyrady.
Qaraǵandy oblysy,
Aqtoǵaı aýdany
