Qara shańyraqtyń mereıtoıy osy oqý ornynda eńbek etip, elimizdiń bilim, ǵylym salasyna aıryqsha úles qosqan ǵalymdardy, oqytýshylardy marapattaý rásimimen bastaldy.
Osy oraıda ýnıversıetet ujymyna quttyqtaý joldaǵan Ǵylym jáne joǵary bilim mınıstri Saıasat Nurbek: «Búgin otandyq ǵylym men joǵary bilim salasynda aıtýly mereke. Ýnıversıtet búginde tek Ortalyq Azııa keńistiginde ǵana emes, álemdik deńgeıdegi irgeli joǵary oqý ornyna aınaldy. 90 jyldyq tarıhy bar qara shańyraq búginde zaman suranysyna jaýap bere alatyn, biliktiligi men bilimi, tájirıbesi men talanty bir arnaǵa toǵysqan sala ıelerin daıarlaýdy aıqyn maqsat etip keledi. Álemniń ekinshi ustazynyń esimin ıelengen qara shańyraq ǵylym men bilim aıdynynda júktelgen mindetterdi joǵary nátıjemen júzege asyryp otyr. Búgingi nátıjeli jumys pen irgeli belester ýnıversıtet ujymynyń tabandy eńbeginiń arqasy dep baǵamdaımyn. QazUÝ-dyń 90 jyldyq torqaly toıy 100 jyldyq tuǵyry bıik ǵasyr toıyna ulassyn», dep atap ótti.
Jıyn barysynda Ǵylym jáne joǵary bilim mınıstri Ǵanı Bektaevtyń quttyqtaýy oqylyp, vıse-mınıstr Darhan Ahmed-Zakı, Almaty qalasynyń ákimi Erbolat Dosaev sóz sóılep, ýnıversıtet mereıtoıynyń mańyzdylyǵyna toqtalyp, qara shańyraqtaǵy ǵalymdardyń jetistigi týraly aıtyp ótti.
QazUÝ-dyń basqarma tóraǵasy-rektor Janseıit Túımebaev oqý orny ujymyn 90 jyldyq mereıtoıymen quttyqtap, bul mereıli beleske ýnıversıtet úlken tabystarmen jetkendigine toqtaldy. Osy oraıda ýnıversıtet ǵalymdary medaldarmen, Alǵys hattarmen marapattaldy.
«QazUÝ halyqaralyq QS reıtınginde 230-orynda. QS Asia ýnıversıtetteri reıtıngi boıynsha 29-shy satyda. 90 jyldyq tarıhy bar ýnıversıtette 3354 oqytýshy-professor tabysty eńbek etýde. Onyń ishinde 11 QR UǴA akademıgi, QR Joǵary mektebiniń úsh akademıgi, Joǵary mektebi Ǵylym akademııasynyń segiz akademıgi, jeti UǴA korrespondent-múshesi bar. Sondaı-aq 603 doktor, 736 ǵylym kandıdaty, 512 PhD jumys isteıdi. Bıyl 32 oqytýshy «Joǵary oqý ornynyń úzdik oqytýshysy – 2023» respýblıkalyq baıqaýynda jeńimpaz atandy. Kez kelgen ýnıversıtet mártebesi oqytýshy ǵalymdardyń eńbegimen, túlekteriniń sapasymen ólshenedi. QazUÝ túlekteriniń arasynda memleket jáne qoǵam qaıratkerleri, kórnekti ǵalymdar, qalamgerler, kásipker-mesenattar, tájirıbeli dıplomattar jetkilikti. QazUÝ-da jyldar boıy qalyptasqan belgili qaıratker tulǵalardyń, myqty oqytýshy-professorlarymyzdyń ǵylymı mektepteri qalyptasqan. Ýnıversıtet osy ǵylymı mektepterdi ary qaraı jalǵastyryp, jańa baǵytta damyta beretin bolady. Qazir 25 myńnan astam stýdentimiz bar. Stýdentterimiz AQSh, Eýropa, Azııanyń ozyq ýnıversıtetterinde bilimin jetildirýde. QazUÝ álemniń 650-den astam joǵary oqý oryndary jáne uıymdarymen tyǵyz qarym-qatynasta. 2022 jyly Memleket basshysy Qasym-Jomart Toqaevtyń Túrkııa men Qyrǵyzstanǵa resmı sapary aıasynda Ystambul, Bishkek qalalarynda QazUÝ fılıaldary ashyldy. Ýnıversıtet bazasynda Reseıdiń MIFI Ulttyq ıadrolyq zertteý ýnıversıtetiniń fılıaly jumys isteıdi. 2023 jyly Qazaqstan Prezıdentiniń Qytaıǵa memlekettik sapary barysynda QazUÝ bazasynda Soltústik-batys polıtehnıkalyq ýnıversıtetiniń fılıalyn ashý týraly kelisildi. Fılıal 12 qazanda ashyldy», dedi rektor óz sózinde.
QazUÝ 2022 jyly zertteý ýnıversıteti mártebesin alǵannan keıin ǵylymǵa basymdyq bere bastady. Sońǵy úsh jylda ýnıversıtet ǵylymynan túsken tabys eki esege jýyq ósti. Qazirgi tańda 8,5 mıllıard teńgeniń granttyq jobalary oryndalyp jatyr. 2023 jyly QazUÝ ǵalymdary QR Ǵylym jáne joǵary bilim mınıstrliginiń Ǵylym komıtetinen 3,8 mlrd teńgeniń megagrantyn utyp aldy.
2024-2027 jyldar aralyǵynda Memleket basshysy Qasym-Jomart Kemeluly Toqaevtyń qoldaýymen QazUÝ qurylysynyń II kezeńi ótedi. Árqaısysy 1060 oryndyq, jalpy 3180 orynǵa arnalǵan zamanaýı úsh jataqhana qurylysy júrip jatyr. Budan bólek, oqý korpýstary, sporttyq-saýyqtyrý ortalyǵy, ınnovasııalyq ortalyq, ǵylymı-zertteý ortalyǵy, tehnopark josparlanǵan. Oqý ornynyń 90 jyldyq mereıtoıyna oraı, QazUÝ-da Ortalyq Azııadaǵy alǵashqy Indýstrııa 4.0 modeldik fabrıkasyn qurý josparlanyp otyr. Bul jobany QazUÝ Tech Garden «Innovasııalyq tehnologııalar parki» derbes klasterlik qorymen birlesip iske asyrady. Robototehnıka jáne robottandyrý salasyndaǵy jańa startaptarǵa qoldaý kórsetetin ortalyq bıylǵy jyldyń ekinshi toqsanynda ashylady. Budan bólek QazUÝ-da Qytaı úkimetimen kelisilgen Silicon Valley modeli boıynsha IT-tehnopark qurý jónindegi birlesken joba qolǵa alynýda. Sekýndyna 1800 (1800 Tfp) júzege asyratyn sýperkompıýterge qarajat QHR úkimeti esebinen bólinip, QazUÝ-da ornatylady. Búgin mereıtoıǵa oraı, hımııa jáne hımııalyq tehnologııa fakýlteti janynan galvanıkalyq qaptamalardyń Chemical Coatings Innovations (ShemCoIn) ǵylymı-óndiristik ortalyǵy ashyldy.
