Qysqy joldyń qaýpi

Joldyń qıyndyǵy tazalaýshy fırmalarmen qatar jer­gilikti polısııa qyzmet­ker­leriniń qyzmetin de «qyz­dy­ryp» tur. Tártip saq­shylary kúnine san qaıtara omby qarda turyp qalǵan kólik júrgizý­shi­lerine kómektesýden ábden sharshaǵan. Ásirese, aýyl ara­syn­daǵy joldardyń qateri joǵary. Mundaǵy joldar jabylmaǵandyqtan qar­dyń qa­lyńdyǵyna, boran basyp qala­tyn jerlerdiń moldyǵyna qaramaı, jolǵa shyǵyp ketýshiler kóp. Máselen, ótken jeksenbide Mamlıýt aýdanyndaǵy Dýbrov­noe aýylynyń syrtynan ótetin jolda birden birneshe kólik qar qursaýynda qalǵan. Jergilikti turǵyndardyń biri ózine habarlasqannan keıin ýchaskelik polısııa ınspektory Álibek О́sipov atqa qonyp, jolaýshylardy qutqarý úshin «QazAvtoJol» traktorlaryn kómekke shaqyrady. Inspektor der kezinde shaqyrǵan traktor qar qursaýynda qalǵan ýchastokty arshyp, 20 gradýstyq sýyqta tisteri tisine tımeı tońa bastaǵan adamdar qutqaryldy. Aman qalǵan turǵyndar tipti alǵysqa toly beınekórinisterin PD basshylyǵyna jiberip te úlgergen. Onda: «Úsh saǵat boıy jolda turdyq, áıteýir der kezin­de kómekke shaqyrǵan polısııa qyzmetkeriniń arqasynda tehnıka keldi. Álibekke rahmet!», dep jazylǵan.

Osyndaı qutqarý oqıǵala­ry­nyń biri Qyzyljar aýdanynda da boldy. Munda ýchaskelik ınspektor Aqyl Baıteńizov óziniń qyzmettik «Nıvasymen» «Teplıchnoe» aýylynyń tu­synda qarǵa batyp turǵan Pet­ro­pavl qalasy turǵynynyń «GAZel» avtokóligin súırep shyǵarǵan. Taǵy bir ýchaskelik polısııa ınspektory Bahtııar Amangeldıev Arhangelskoe aýylyna ata-analaryna demalysqa bara jatqan jas otbasynyń kóligin qalyń qardy qazyp, alyp shyǵýǵa kómektesti. Ishinde jas balasy bar otbasynyń da tártip saqshysyna aıtar alǵysy sheksiz.

Al ýchaskelik ınspektor Jambyl Oralbaev Sokolovka aýyly turǵynynyń qar­da batyp qalǵan «VAZ»-yn óz kóli­gi­men tartyp shyǵara alma­ǵan soń «Nıvasy» bar kór­shiles Vınogradovka aýy­ly­nyń turǵyny Andreı Pantıýhovty kómekke shaqyryp, sonyń arqasynda jolaýshylardy sýyqtan aman alyp qalǵan. Al Reseıdiń Sýrgýt qalasynan «Petropavl – Astana» jolymen úıine kele jatqan júrgizýshiniń joldan shyǵyp ketken «Honda» avtokóligin shyǵaryp alý úshin polısııa qyzmetkerleri Tamerlan Tastanbek pen Hamıt Sádýaqasovqa jergilikti sharýa qojalyǵynyń dırektory Vıktor Redınniń traktoryn shaqyrtýǵa týra kelgen.

«Hyundai» kóligimen qasyna eki eresek balasyn alyp, Kók­shetaý qalasyna bara jatqan Reseı azamatyn da saqshylar joldyń 346-shaqyrymynda ajaldan qut­qar­dy. Kóktaıǵaqta rólge ıe bola almaı qalǵan reseılik joldan 10 metrdeı jer­ge ushyp ketip, qalyń qarda ombylap qal­ǵan eken. Jo­laý­shylardy oblystyq PD patrýldik polısııa batalo­ny­nyń qyz­met­kerleri Evgenıı Vıshnevskıı men Altynbek Omarov qosymsha kólik shaqyr­typ, qutqardy.

Qazir óńirdegi kúre joldarda mundaı oqıǵalar kún saıyn tirkelip jatyr. Mysalǵa keltirgenimiz tek birnesheýi ǵana. Osyǵan oraı polısııa qyzmetkerleri júrgizýshilerdi avtomobıl joldarynyń jabylýy týraly habarlamalardy baqylap otyrýǵa, qysqy joldarda óte muqııat bolýǵa shaqyrady. Biraq jeldeı esken kólikpen tez jetip qalamyn dep oılaıtyn jaýapsyz jolaýshylar quzyrly organdardyń eskertpelerin qastyq qylǵandaı kórip, qashyp-pysyp jolǵa shyǵyp jatady. Mundaı asyǵys­tyqtyń aqyry polısııa qyzmet­ker­leri bolmasa, keıde úlken tragedııamen de aıaqtalyp jatady.

Soltústik Qazaqstan oblysy