Jáýtikov júldegerleri

Olımpıada jeńimpazdaryn quttyq­taǵan Oqý-aǵartý mınıstri Ǵanı Beısem­baev elimizdiń bilim salasy úshin aıtýly is-sharanyń keıingi 20 jyl ishinde daryndy jas matematıkter býynynyń qalyptasýyna yqpal etkenin atap ótti. «Halyqaralyq Jáýtikov olımpıadasy talantty oqýshylar úshin bilim básekesine aınaldy, qazaq mádenıeti men dástúrin álemge tanytýǵa jol ashty. Qatysýshylardyń árqaısysy matematıka jáne fızıka sııaqty irgeli ǵylymdar boıynsha laıyqty nátıjeler kórsetip, óz eliniń týyn maqtanyshpen kókke kóterdi. Kórnekti ǵalym-matematık, akademık Orymbek Jáýtikov esimimen atalatyn olımpıada alańynda kúni búginge deıin álemniń kóptegen elinen kelgen oqýshylar baq synaýymen qatar, bilim salasyndaǵy jańa daǵdylardy ıgerýge, tájirıbe jınaýǵa múmkindik aldy», dedi mınıstr.

Respýblıkalyq fızıka-matematıka mektebi dırektorlar keńesiniń tór­aǵasy Berik Qanıevtiń aıtýynsha, olımpıadanyń úsh pánnen ótýi dás­túrli is-sharanyń ereksheligin kórse­tip, jas býynnyń ıntellektýaldy deń­geıiniń damýyna barynsha yq­pal etip jatyr. Qazylar alqasynyń tór­aǵasy, Ulttyq ǵylym akademııasy vıse-prezıdenti Asqar Ju­ma­dildaev atap ótkendeı, Jáýtikov olımpıadasynyń búginde geografııasy keńeıdi. Fızıka-matematıka ǵylymyn oqýshylar arasynda nasıhattaýmen qatar, mamandandyrylǵan mektepterdiń tájirıbe jınaýyna, olımpıadalar ótkizýdegi, sondaı-aq bilim men mádenı baılanystaryna jol ashty.

Qazaqstan, Reseı, Belarýs, Arme­nııa, Ońtústik Koreıa, Qytaı jáne Amerı­kadan kelgen mamandar zııatkerler dodasyna tórelik etti. Jaqsy nátıje kórsetken qatysýshylarǵa matematıkadan – Nurlan Qapparov atyndaǵy, fızıkadan – Ádilet Imambekov, ınformatıkadan – Ilıa Segalovıch atyndaǵy syılyqtar tabys etildi.

Úsh pánnen qatysqan 344 qaty­sý­shy HH Halyqaralyq Jáýtikov olım­pıa­dasynyń júldegeri atandy. Bas júlde Sankt-Peterbýrg qalasynan kelgen №239 prezıdenttik fızıka-matematıka lıseıiniń komandasyna buıyrsa, I oryn­dy Máskeýdegi V.F.Ovchınnıkova atyn­daǵy «Ekinshi mektep» ıelendi. II oryn­dy Tbılısıden kelgen L.V.Komarov atyn­daǵy №199 matematıka jáne fızıka arnaıy mektebiniń jáne Dolgoprýdnyı qalasyndaǵy P.L.Kapısa atyndaǵy «Fızteh-lıseıi» bólisti. III oryndy Mınskidegi BGÝ lıseıi, Sofııa qa­lasyndaǵy Sofia High School of Mathe­matics, Dolgoprýdnyı qalasyndaǵy P.L.Ka­pısa atyndaǵy «Fızteh-lıseıi» jáne Al­matydaǵy Respýblıkalyq fızı­ka-mate­matıka mektebi ıelendi.

Olımpıadada el oqýshylary 109 medal jeńip aldy. Onyń 10-y – altyn, 43-i – kúmis, 56-sy – qola medal.

ALMATY