17 qańtar kúni Qaztalov, Jalpaqtal, Jańajol, Bolashaq, Taldyqudyq, Qaraózen, Qoshankól aýyldarynan 22 turǵyn úı jańa ıesin tapty. Bul úıler aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi arqyly kezekte turǵan turǵyndarǵa berildi. 22 páterdiń 18-i – jekelerden satyp alynǵan, al 4-eýi jańadan salynǵan.
Bul qýanyshty jaǵdaı halyqtyń áleýmettik osal toptary úshin jalǵa beriletin turǵyn úıler satyp alý úshin respýblıkalyq bıýdjetten bólingen 192 mln teńge qarajattyń esebinen júzege asty.
– Búgin biz ónegeli istiń kýási bolyp otyrmyz. El Prezıdenti Qasym-Jomart Toqaevtyń tapsyrmasyna sáıkes óńirlerdi damytý, aýyldyq eldi mekenderdi gúldendirý maqsatynda birqatar baǵdarlama júzege asyp jatyr. Sonyń nátıjesinde búgin turǵyn úı kezeginde 4 sanat boıynsha turǵan 22 otbasyna jańa baspana berip otyrmyz. Búgingi páter ıelerin qýanyshymen quttyqtaımyn! Jańa baspana tatýlyq pen berekeniń ordasy bolyp, qýanysh pen baqyt, qut pen yrys saltanat qursyn! – dedi aýdan ákimi Aslanbek Sarqulov.
2020-2025 jyldarǵa «Nurly jer» memlekettik baǵdarlamasy sheńberinde kommýnaldyq turǵyn úıin salý jáne rekonstrýksııalaý maqsatta qýatty aımaqtar men damyǵan ınfraqurylym qalyptastyrý isi Aqjaıyq aýdanynda da júıeli túrde júzege asyp keledi. Osynyń dálelindeı aýdan ortalyǵynda úsh qabatty 24 páterlik turǵyn úı qurylysy aıaqtaldy. Buǵan qosa Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasyna sáıkes respýblıkalyq bıýdjet esebinen turǵyn úı kezeginde turǵan azamattarǵa kommýnaldyq turǵyn úı qorynyń úılerin satyp alý baǵdarlamasy aıasynda aýyldyq okrýgter boıynsha 12 turǵyn úı páteri paıdalanýǵa berildi.
Batys Qazaqstan oblysy
