Konkýrsqa barlyǵy 1,5 myńdaı úmitker qatysty. Festıval Máskeýdiń «Kosmos» qonaqúıiniń úlken konserttik zalynda ótti. Qazylar qatarynda Iý.Grıgorovıch atyndaǵy konkýrstyń «Horeograf» atalymy boıynsha eki dúrkin laýreaty, N.Sas atyndaǵy balalar mýzykalyq teatrynyń qoıýshy-rejısseri E.Baryshnıkova, halyqaralyq deńgeıdegi top-pedagogterdiń biri D.Akımenko sııaqty bilikti mamandar boldy.
Reseıdiń barlyq óńirlerinen kelgen ónerpaz ulandar arasynda «Qarlyǵash» ansambli Qazaqstannan jalǵyz baryp, «halyqtyń stıldik bıi» atalymy boıynsha óner kórsetti. Olar «Sulý qyzdar» jáne «Severnye kartınkı» atty eki nómir oryndady.
Jeńimpaz jetkinshekterdi poezdan Petropavl qalasynyń ákimi S.Muhamedıev bastaǵan resmı adamdar, ustazdar men týystary qarsy aldy. «Balalarymyzdyń jeńiske jetkenine qýanyshtymyz. Olar búkil Qazaqstannyń atyn shyǵaryp, tabyspen oralyp otyr. Biz olardyń bolashaqta da úlken bıikterden kórinýin tileımiz», dedi ákim óziniń sózinde.
Ansambldiń kórkemdik jetekshisi Galına Jumalıevanyń qýanyshy erekshe deýge bolady. Ol tebirenip turyp óziniń sezimin bylaı jetkizdi: «Shynyn aıtqanda biz qatty tolqydyq. Reseıdiń túkpir-túkpirinen kelgen horegrafııalyq ujymdardyń daıyndyǵy óte kúshti eken. Bári de jalyndap turǵan jastar. Olardyń arasynda bizdiń ujym barynsha qarapaıym bolyp kórindi. Biraq sahnaǵa shyqqanda shabyttanyp ketti. О́zimizdiń ulttyq kolorıtimizdi jarqyldatyp, qazaq óneriniń otyn laýlatyp jiberdi. Oǵan kórermender qatty rıza bolyp, uzaq ýaqyt qol soqty. Bizdiń bıimiz festıvaldiń jańalyǵyndaı boldy. Sondyqtan da qazylar birinshi oryn berdi», dedi ol.
«Qarlyǵash» ansambliniń qurylǵanyna 50 jyldaı ýaqyt bolǵan. Ol buǵan deıin de elimizdiń jáne álemniń san túrli sahnalarynda óner kórsetken. Balǵyn bıshilerdiń qazirgi horeografy Vıktorııa Tıhonkova uzaq jyldardan beri jumys isteıdi. «Bizdiń ansambl negizinen halyq bılerin oryndaýǵa mamandanǵan. Repertýarymyzda qazaq, orys jáne basqa da ulttardyń bıleri bar. Biz Máskeýge birinshi ret bardyq, ondaǵy mamandardyń eńbegimizdi joǵary baǵalaǵanyna qýanyshtymyn», dedi ol.
Qarsy alýshylar ónerpazdarǵa túrli syılyqtar, dıplomdar men kýboktar tapsyrdy. Máskeý festıvalinde olarǵa Týapse qalasynda bolatyn festıvalǵa shaqyrý berilgen. Sonymen birge ansambl osy jazda Sankt-Peterbýrgte bolatyn festıvalǵa qatysýdan úmitti.
PETROPAVL
